بانڈی پورہ: آتشزدگی میں 3 رہائشی مکان، ایک گاؤ خانہ خاکستر

شمالی کشمیر کے ضلع بانڈی پورہ میں آتشزدگی کے دوران تین رہائشی مکانات اور ایک گاؤ خانہ خاکستر ہوگئے جب کہ اس واردات میں ایک گائے بھی جھلس کر ہلاک ہو گئی۔

ضلع بانڈی پورہ کے بنکوٹ علاقے میں ایک رہائشی مکان سے اچانک آگ نمودار ہوئی جس نے آناً فاناً دو دیگر رہائشی مکانات اور ایک گاؤ خانہ کو اپنی زد میں لے لیا۔

مقامی رضاکاروں اور فائر اینڈ ایمرجنسی اہلکاروں نے آگ کو مزید پھیلنے سے روک دیا تاہم اس دوران تین رہائشی مکانات اور ایک گاؤ خانہ مکمل طور پر خاکستر ہوگئے جب کہ اس حادثے میں ایک گائے بھی جھلس کر ہلاک ہو گئی۔

آگ کے حادثہ میں لاکھوں کی املاک خاکستر ہوگئیں جب کہ کئی کنبے بے گھر ہو گئے۔

اس ضمن میں پولیس نے کیس درج کرکے مزید کارروائی شروع کر دی ہے۔