اضافی کرائے کی وصولی، ڈرائیوروں پر جرمانہ عائد

مسافروں سے اضافی کرایہ وصول کرنے کی عوامی شکایات کے بعد اسسٹنٹ ریجنل ٹرانسپورٹ آفیسر بانڈی پورہ نے سوناواری میں گاڑیوں کی چیکنگ شروع کی جس کے دوران ٹریفک قوانین کی خلاف ورزی کرنے کی پاداش میں ڈرائیوروں پر جرمانہ عائد کیا گیا اور اس کے علاوہ کئی گاڑیاں بھی ضبط کی گئی۔

تفصیلات کے مطابق اے آر ٹی او بانڈی پورہ کو مسلسل کچھ روز سے یہ شکایات موصول ہورہی تھیں کہ بانڈی پورہ سے سرینگر جانے والی سومو گاڑیاں سواریوں سے اضافی کرایہ وصول کرتی ہیں جس کے بعد انہوں نے بانڈی پورہ کے سوناواری علاقے میں گاڑیوں کی چیکنگ کا عمل شروع کیا اور اس دوران انہوں نے کئی افراد کو اضافی کرایہ وصول کرنے کی پاداش میں ان پر جرمانہ عائد کیا۔

اس کے علاوہ کئی گاڑیاں اس دوران ضبط بھی کی گئیں۔ اے آر ٹی او صہیب احمد نے ای ٹی وی سے بات کرتے ہوئے کہا کہ وہ یہ عمل آنے والے دنوں میں بھی جاری رکھیں گے۔

اس کے علاوہ انہوں نے تمام سومو ڈرائیوروں کو متنبہ کیا کہ وہ کسی بھی صورت میں سواریوں سے اضافی کرایہ وصول نہ کریں، ورنہ ان کے خلاف قانونی کارروائی کی جائے گئی-