فوج کی جانب سے فٹ بال پریمیئر لیگ کا اہتمام

اس ٹورنامنٹ کا مقصد نوجوانوں میں کھیلوں کی اہمیت کو فروغ دینا اور اس کے علاوہ نوجوانوں کے اندر حب الوطنی کا جذبہ پیدا کرنا ہے۔

فوج نے مقامی نوجوانوں کو قومی دھارے میں شامل کرنے اور وادی میں کھیلوں کی اہمیت کو فروغ دینے کی ایک اور کوشش کے تحت حاجن بانڈی پورہ میں چنار فٹ بال پریمیئر لیگ کا اہتمام کیا-
یہ فٹ بال ٹورنامنٹ ضلع بانڈی پورہ کے وجپارہ حاجن نامی علاقے میں 13 راشٹریہ رائفلز کے زیر اہتمام منعقد کیا گیا۔ ٹورنامنٹ کی افتتاحی نشست کے دوران مقامی لوگوں کی ایک بڑی تعداد موجود تھی۔ اس کے علاوہ اس فٹ بال ٹورنامنٹ میں بارہمولہ، گاندربل اور ضلع بانڈی پورہ کی 16 ٹیمیں حصہ لے رہی ہیں۔ میچ کے دوران بڑی تعداد میں شائقین اپنی مقامی ٹیموں کی حمایت کرتے دیکھے گئے۔

چنار فٹ بال لیگ کا پہلا میچ بارہمولا بمقابلہ ونگی پورہ سمبل کے درمیان وجپارہ پلے گراؤنڈ میں کھیلا گیا۔ پہلے میچ میں ضلع بانڈی پورہ سے شہریوں کی ایک بڑی تعداد نے حصہ لیا اور اس موقع پر 13 راشٹریہ رائفلز کے اعلیٰ افسران بھی وہاں موجود تھے-اس ٹورنامنٹ کا مقصد نوجوانوں میں کھیلوں کی اہمیت کو فروغ دینا اور اس کے علاوہ نوجوانوں کے اندر حب الوطنی کا جذبہ پیدا کرنا ہے-

شاہ زیب نامی ایک کھلاڑی نے بتایا کہ وہ فوج کے شکر گزار ہیں کہ انہوں نے فٹ بال ٹورنامنٹ کا اہتمام کیا ہے۔ انہوں نے کہا کہ فوج نے اس سے قبل بھی کئی کرکٹ ٹورنامنٹ منعقد کئے ہیں جس کی وجہ سے نوجوان نسل کھیلوں کی جانب راغب ہو رہی ہے جو ایک بہترین مستقبل کا عندیہ ہے۔