کازی رنگا جنگل سے گذرنے والی شاہراہ پر ’ٹائم کارڈ سسٹم‘ نافذ

آسام کے ضلع گولاگھاٹ میں کازی رنگا نیشنل پارک کا 60 فیصد حصہ سیلاب کی تازہ لہروں کی لپیٹ میں ہے جبکہ حکام جنگل سے گذرنے والی شاہراہ سے جانے والی گاڑیوں کی رفتار کو محدود کرنے کےلیے ٹائم کارڈ سسٹم نافذ کرنے پر مجبور ہوگئے ہیں۔

حکام کے مطابق جنگل سے گذرنے والی شاہراہ پر رفتار کی حد کا نفاذ ضروری ہوگیا ہے کیونکہ سیلاب کی وجہ سے زمین کی تلاش میں جانور پارک کے دوسری جانب جانے کی کوشش کررہے ہیں اور ایسے حالات میں بہت سارے جانور تیز رفتار گاڑیوں سے ٹکرا سکتے ہیں۔

لہذا حکام نے نیشنل ہائی وے 37 پر آنے والی گاڑیوں پر ٹائم کارڈ سسٹم نافذکیا ہے جو پارک کو دو حصوں میں تقسیم کرتی ہے۔ پارک حکام کی جانب سے رفتار کی حد کی خلاف ورزی کرنے والوں پر پانچ ہزار روپئے جرمانہ عائد کیا جارہا ہے۔

یہ پیشرفت اس وقت ہوئی جب گذشتہ روز پوبیٹورا وائلڈلائف سینکچواری میں ایک گینڈے کی لاش برآمد ہوئی تھی، محکمہ جنگلات اب سیلاب سے جانوروں کو محفوظ رکھنے کےلیے ہرممکن کوشش کر رہا ہے۔

آسام ڈیزاسٹر منجمنٹ اتھاریٹی کی جانب سے جاری سیلاب رپورٹ میں بتایا گیا ہے کہ دریائے برہما پترا خطرے کے نشان سے اوپر بہہ رہی ہے۔

آسام کے 25 اضلاع سیلاب سے متاثر ہوئے ہیں جبکہ یہاں شدید بارش کا سلسلہ جاری ہے۔