منی پور میں میانمار کے بتیس تارکین وطن گرفتار

منی پور میں بھارت میانمار سرحد پر خصوصی کارروائی کے دوران منی پور پولیس نے میانمار کے 32 تارکین وطن کو گرفتار کیا ہے۔ ان تارکین وطن پر پولیس کو درست دستاویزات نہیں دکھانے کا الزام ہے۔ Myanmar immigrants in Manipur

تیج پور: منی پور پولیس نے بدھ کو بھارت میانمار سرحد پر ایک خصوصی آپریشن میں میانمار کے 32 تارکین وطن کو گرفتار کیا ہے۔ منی پور پولیس کے ایک اہلکار نے بتایا کہ گرفتار تارکین وطن میں سے دس کو مزید تفتیش کے لیے ہیلی کاپٹر کے ذریعے امپھال منتقل کیا گیا جب کہ دیگر 22 کو مورہ پولیس اسٹیشن میں ہی رکھا گیا ہے۔

اس گرفتاری کے بعد منی پور پولیس کی ایک ٹیم مرکزی سیکورٹی فورسز کے ساتھ بدھ کی دوپہر دو بجے کے قریب مورہ پہنچی جس کے بعد مورہ مارننگ مارکیٹ کالونی اور آس پاس کے علاقوں میں سرچ آپریشن شروع کیا گیا۔ منی پور پولیس کے ایک ذریعہ نے بتایا کہ مشترکہ سیکورٹی فورسز جس میں خصوصی پولیس کمانڈوز، انڈیا ریزرو بٹالین اور آسام رائفلز شامل ہیں، نے مسلسل چھاپوں کے دوران تقریباً 44 کوکی کمیونٹی کے لوگوں کو گرفتار کیا ہے۔

ذرائع کے مطابق حراست میں لیے گئے تارکین وطن کو فی الحال امپھال مشرقی ضلع کے ساجیوا علاقے میں غیر ملکی حراستی مرکز میں رکھا گیا ہے۔ پولیس ذرائع کا کہنا ہے کہ میانمار کے تارکین وطن کے خلاف قانونی کارروائی کی جائے گی۔ واضح رہے کہ منگل کو منی پور کے مورہ علاقے میں عسکریت پسندوں کی طرف سے انجام دیے گئے دو الگ الگ واقعات میں سب ڈویژنل پولیس افسر ہلاک اور تین کانسٹیبل زخمی ہوگئے تھے۔