تریپورہ میں بورڈ کے امتحانات منسوخ

تریپورہ بورڈ آف سیکنڈری ایجوکیشن (ٹی بی ایس ای) نے ہفتہ کے روز اس سال کے سیکنڈری اور ہائر سیکنڈری امتحانات منسوخ کرنے کا اعلان کیا۔

یہ امتحانات 18 مئی سے شروع ہونے تھے لیکن ریاست میں کورونا وائرس کے متاثرین میں اضافے کے پیش نظر اسے ملتوی کر دیا گيا تھا جسے اب منسوخ کر دیا گيا ہے۔

دریں اثناء سینٹرل بورڈ آف سیکنڈری ایجوکیشن (سی بی ایس ای) اور متعدد ریاستی بورڈ پہلے ہی امتحانات منسوخ کر چکے ہیں۔ جس کے بعد ٹی بی ایس ای پر امتحان منسوخ کرنے کا دباؤ ڈالا جارہا تھا۔

ریاستی حکومت نے بورڈ کے امتحانات کے 47 ہزار سے زیادہ امیدواروں کی اسکریننگ کے لئے ماہرین کی کمیٹی تشکیل دی تھی جس میں ماہرین تعلیم، اعلی عہدیداروں، صحت کے ماہرین اور ماہرین نفسیات شامل تھے۔

کمیٹی نے اس ہفتے کے شروع میں میٹنگ کی تھی اور وائرس پھیلنے کے خدشے کے پیش نظر امتحان نہ لینے پر اپنی رائے ظاہر کی تھی۔

ریاستی وزیر تعلیم رتن لال ناتھ نے کہا کہ اس کے علاوہ تریپورہ حکومت نے ڈیجیٹل پلیٹ فارم کے ذریعے والدین کی رائے اور مشورے بھی لئے ہیں اور 85 فیصد سے زیادہ افراد نے امتحان کے انعقاد کی مخالفت کی ہے۔

انہوں نے کہا کہ ٹی بی ایس ای ماہرین کے مشورے سے معیاری طریقہ کار تیار کرے گی اور دونوں امتحانات کے نتائج 31 جولائی تک اعلان کیے جائیں گے۔