آسام کو جنوری-جولائی کے درمیان ٹیکہ کاری کے لئے تیار رہنے کی ہدایت

مرکزی حکومت نے آسام سے آئندہ سال جنوری سے جولائی کے درمیان کورونا وائرس (کووڈ ۔19) کی ٹیکہ کاری کے لیے تیار رہنے کو کہا ہے۔

آسام میں منگل کے روز پریس کانفرنس کے دوران اطلاع دیتے ہوئے وزیر صحت ڈاکٹر ہمنت بِسوا شرما نے کہا کہ مرکز کے ساتھ اپنی حالیہ ملاقاتوں میں کورونا وائرس کی ٹیکہ کاری کے عمل پر زیادہ توجہ دی گئی ہے۔

انہوں نے کہا کہ 'مرکز نے ہمیں آئندہ سال جنوری اور جولائی کے درمیان ٹیکہ کاری کے پروگراموں کے لئے تیار رہنے کو کہا ہے'۔

بسوا شرما نے کہا کہ مرکز کو چھ سے سات ذرائع سے ویکسین ملنے کی امید ہے اور یہ کہ ملک میں ایک ہی برانڈ کی ویکسین نہیں ہوگی۔

انہوں نے کہا کہ قطرے پلانے کے لیے کورونا واریئرس اور 60 سال سے زیادہ عمر کے افراد کو ترجیح دی جائے گی۔