حق رائے دہی کے استعمال کے بعد بدرالدین اجمل نے کیا کہا؟

اے آئی یو ڈی ایف کے صدر بدرالدین اجمل نے اپنے ووٹ کا استعمال کرنے کے بعد وزیراعظم نریندر مودی اور امت شاہ پر تنقید کرتے ہوئے سوال کیا کہ ابھی تک انہوں نے کتنے بنگلہ دیشیوں کو واپس بھیجا ہے؟۔

بدرالدین اجمل نے کہا کہ 'وزیر اعظم مودی اور امت شاہ نے کہا ہے کہ وہ بنگلہ دیش سے آئے لوگوں کو واپس بھیجیں گے۔ میں ان سے پوچھنا چاہتا ہوں کہ اب تک کتنے بنگلہ دیشیوں کو واپس بھیجا؟ میں ان کو چیلنج کرتا ہوں کہ یہ بتائیں کہ پچھلے 5 سالوں میں کیا 100 بنگلہ دیشیوں کو بھیجا گیا ہے۔'

ساتھ ہی انہوں نے جیت سے متعلق سوال پر کہا کہ پہلے مرحلے میں 30 سے 32 سیٹیں ہماری آ رہی ہیں اور دوسرا مرحلہ ہمارا ایریا ہی ہے۔ اس لیے بی جے پی کے بڑھنے کا سوال ہی نہیں پیدا ہوتا ہے۔

آل انڈیا یونائیٹڈ ڈیموکریٹک فرنٹ کے صدر بدرالدین اجمل نے آسام کے ہوجائی میں پولنگ مرکز 21 پر حق رائے دہی کا استعمال کیا۔

غور طلب ہے کہ آسام اسمبلی انتخابات کے تحت دوسرے مرحلے میں 13 اضلاع کی 39 نشستوں پر 345 امیدوار اپنی قسمت آزما رہے ہیں۔