دہلی: کانگریس کے صدر ملکارجن کھرگے نےآندھرا پردیش ٹرین حادثہ پر گہرے دکھ کا اظہار کیا ہے۔ انہوں نے سوشیل میڈیا کے اہم پلیٹ فارم ایکس پر اپنے پوسٹ میں کہا کہ انہیں اس حادثہ کے بارے میں سن کر کافی صدمہ ہوا ہے۔ انہوں نے حادثے میں ہلاک ہونے والوں کے غمزدہ ارکان خاندان سے تعزیت کا اظہار کیا اور زخمیوں کی جلد صحت یابی کیلئے نیک تمناوں کا اظہار کیا۔ انہوں نے کانگریس کے کارکنوں سے خواہش کی کہ وہ ہر ممکنہ مدد فراہم کرے۔ انہوں نے حکومت پر تنقید کرتے ہوئے کہا کہ ایسا محسوس ہوتا ہے کہ بالاسور ٹرین حادثہ کے بعد مرکزی حکومت کے ٹرینوں کے تحفظ کے سلسلہ میں تمام دعوے کھوکھلے ثابت ہوئے ہیں۔ ٹرینوں کو جھنڈی دکھانے کا جوش وخروش ٹرینوں کے تحفظ اور روزانہ سفر کرنے والے کروڑوں مسافرین کی بہتری کے لئے دکھایا جانا چاہیے۔
کانگریس لیڈر راہل گاندھی نے بھی آندھرا پردیش میں پیش آئے ٹرین حادثہ پر گہرے دکھ کا اظہار کیا۔ انہوں نے اس حادثہ میں مرنے والے افراد کے ارکان خاندان سے تعزیت ظاہر کی۔ سوشیل میڈیا کے اہم پلیٹ فارم ایکس پر سرگرم راہل گاندھی نے ایک ٹویٹ کرتے ہوئے کہا کہ ”آندھراپردیش کے وجئے نگرم میں ٹرین حادثہ میں بیشتر اموات اورزخمیوں کی خبر پر دکھ ہوا۔ میں غمزدہ خاندانوں سے تعزیت کا اظہار کرتا ہوں اور زخمیوں کی عاجلانہ صحت یابی کیلئے امید کرتا ہوں“۔