آندھراپردیش: دو لاکھ شہریوں کو واپس لانے کے اقدامات

لاک ڈاون کی وجہ سے بیرون ریاستوں میں پھنسے اپنے شہریوں کو واپس لانے کےلیے آندھراپردیش حکومت نے ایک منصوبہ وضع کیا ہے۔

آندھراپردیش کے وزیر صحت الاکالا کرشنا کی صدارت میں ایک اجلاس منعقد ہوا جس میں 13 ریاستوں میں پھنسے تقریباً دو لاکھ مزدوروں اور طلبا کو ریل کے ذریعہ واپس لانے کا فیصلہ کیا گیا۔

انہوں نے بتایا کہ اسپیشل آفیسر کرشنا بابو کی نگرانی میں 9 خصوصی ٹرینوں کے ذریعہ دیگر ریاستوں میں پھنسے ہوئے شہریوں کو آندھراپردیش لایا جائےگا جبکہ انہیں غذا و دیگر سہولیات کی فراہمی کے لیے ریاستی حکومت کی جانب سے اقدامات کئے جارہے ہیں۔

ریاست کے ہر گاؤں میں قرنطینہ سنٹر کی سہولت فراہم کی جارہی ہے اور ریاست بھر میں ایک لاکھ بستروں پر مشتمل قرنطینہ سنٹرس کو دوسری ریاستوں سے آنے والے مزدور اورطلبا کےلیے تیار رکھا گیا ہے۔

آندھراپردیش واپس آنے والے شہریوں کو ان قرنطینہ میں رکھا جائے گا جبکہ یہاں انہیں تمام سہولتیں مہیا کی جائیں گی۔