عرضیوں کی سماعت روزانہ کی بنیاد پر

آندھراپردیش ہائی کورٹ ریاست کے دارالحکومت کے مسئلہ پر معاملہ کی سماعت روزانہ کی بنیاد پر اگلے ماہ کی 21 تاریخ سے کرے گا۔ اس مسئلہ پر داخل کردہ عرضیوں کی سماعت آج ریاستی ہائی کورٹ میں کی گئی۔ اس موقع پر ان عرضیوں کی روزانہ کی بنیاد پر سماعت پر غور کیاگیا۔

تین رکنی بنچ نے واضح کردیا کہ وہ سماجی فاصلہ کی برقراری کو یقینی بناتے ہوئے ان عرضیوں کی سماعت کرنے کیلئے تیار ہے۔آج کی سماعت کے موقع پر سپریم کورٹ کے وکیل نتیش گپتا نے نشاندہی کی کہ ریاستی حکومت وشاکھاپٹنم کے کپولاپاڈو علاقہ میں بڑا گیسٹ ہوز تعمیر کرنے کا منصوبہ رکھتی ہے۔حکومت کا یہ قدم،عاملہ کے دارالحکومت کا حصہ ہے۔

ہائی کورٹ نے چیف سکریٹری کو ہدایت دی کہ وہ 10ستمبر تک جوابی دعوی دائر کریں۔اے پی کے دارالحکومت کو منتقل کرنے ریاستی حکومت کے قدم کے خلاف موجودہ دارالحکومت امراوتی کے کسانوں کے ساتھ ساتھ عوامی تنظیموں،اداروں اور عوامی نمائندوں نے یہ عرضیاں ہائی کورٹ میں دائر کی ہیں۔تاحال تقریبا 70عرضیاں عدالت میں دائر کی گئی ہیں جن کی سماعت سہ رکنی بنچ کررہی ہے۔