آندھرا پردیش: فیکٹری سے گیس کا اخراج، ایک شخص ہلاک

آندھرا پردیش کے ضلع کرنول کے نندیال ٹاؤن میں پائپ سے خارج امونیا گیس کے نتیجہ میں اگرو فیکٹری کے ایک جنرل منیجر کی موت ہوگئی جب کہ تین افراد بیمار ہوگئے۔

پولیس نے کہا کہ جنرل منیجر سرینواس راو کی موت گیس سے ہوئی۔دوٹن امونیا گیس کا اسٹاف اس فیکٹری میں ٹینکر میں رکھا گیا تھا۔ تاہم پائپ میں شگاف کے نتیجہ میں اچانک گیس کا اخراج شروع ہوگیا۔

گیس کے اخراج کو محسوس کرتے ہوئے دیگر ملازمین پریشانی کے عالم میں فیکٹری سے روانہ ہوگئے۔ اس واقعہ کی اطلاع پر فائر بریگیڈ کے اہلکار وہاں پہنچے۔

ضلع کلکٹر جی ویراپانڈین، ایس پی کے فقیرپپا اور دیگر عہدیداروں نے فیکٹری کا معائنہ کیا۔ کلکٹر نے صحافیوں کو بتایا کہ تین ملازمین بیمار ہوگئے ہیں جن کی حالت خطرہ سے باہر ہے۔انہوں نے مزید کہا کہ اس گیس کے اخراج کو روکنے کا کام کیا جارہا ہے۔