آندھرا پردیش: سڑک حادثے میں 12 افراد ہلاک

ریاست آندھرا پردیش کے ضلع کرشنا میں ایک دلدوز سڑک حادثے میں 12 افراد ہلاک ہو گئے۔ ہلاک ہونے والوں میں دو بچے بھی شامل ہیں۔

ریاست آندھرا پردیش (اے پی) کے ضلع کرشنا میں پیش آئے ایک دلدوز سڑک حادثے میں 12 افراد ہلاک اور14 زخمی ہو گئے۔

یہ حادثہ ضلع کے جگیاپیٹ منڈل کے ویدادری کے قریب بدھ کی دوپہر اُس وقت پیش آیا جب ایک لاری اور ٹریکٹر میں تصادم ہوگیا۔ حادثہ اتنا شدید تھا کہ 7 افراد موقع پر ہی ہلاک ہوگئے جبکہ دو کی موت اسپتال میں علاج کے دوران ہوئی۔ مرنے والوں میں دو بچے بھی شامل ہیں۔

زخمیوں کو علاج کے لئے فوری طور پر جگیاپیٹ کے سرکاری اسپتال منتقل کیا گیا۔

مرنے والوں کا تعلق پڑوسی ریاست تلنگانہ کے ضلع کھمم کے ایروپالیم گوپاورم دیہات سے ہے۔ جو مندر کے درشن کے بعد واپس گھر لوٹ رہے تھے۔

عینی شاہدین نے بتایا کہ تیز رفتار سیمنٹ کی لاری نے ٹریکٹر کو ٹکر ماری۔ حادثہ کا مقام دلخراش منظر پیش کر رہا تھا اور ہر طرف لاشیں بکھری ہوئی تھیں۔

حادثے کے وقت ٹریکٹر میں 30 افراد سوار تھے۔ زخمیوں میں تین کی حالت تشویشناک بتائی جا رہی ہے۔