Amarnath Yatra 2023 دل کا دورہ پڑنے سے 2 یاتریوں کی موت

اونچائی پر آکسیجن کی کم مقدار کی وجہ سے دل کا دورہ پڑنا امرناتھ یاتریوں میں اموات کی سب سے عام وجوہات میں سے ایک ہے۔ امسال امرناتھ یاترا میں قدرتی طور پر مرنے والے یاتریوں کی تعداد 36 ہوگئی ہے۔

اننت ناگ:امرناتھ یاترا پر آئے راجستھان کے 2 یاتریوں کا دل کا دورہ پڑنے سے موت واقعہ ہوئی ہے۔ سرکاری ذرائع کے مطابق رواں برس ابھی تک یاترا کے دوران مرنے والوں کی تعداد بڑھ کر 36 ہو گئی ہے۔

تفصیلات کے مطابق رجستھان کے رہنے والے فتح لال مناریا اور مانگی لال جو امرناتھ یاترا کے لیے آئے تھے کی موت ہفتہ کے روز ہوئی ہے۔فتح لال کی موت امرناتھ گھپا کے قریب ہوئی ہے جبکہ مانگی لال نے بالتل بیس کیمپ میں دم توڑ دیا۔دونوں کی عمر تقریباً 60 برس بتائی جا رہی ہے۔بتایا جا رہا یے کہ یاتریوں کی موت دل کا دورہ پڑنے سے ہوئی ہے۔ان دونوں اموات کے ساتھ ہی رواں برس قدرتی طور پر مرنے والے یاتریوں کی تعداد 36 ہوگئی ہے۔

بلند ترین چوٹیوں پر آکسیجن کی کمی امرناتھ یاتریوں کی اموات کی عام وجہ ہے۔آکسیجن کی کمی کے سبب اکثر و بیشتر یاتری موت کا شکار ہو جاتے ہیں۔انتظامیہ کی جانب سے یاتریوں کے لئے آکسیجن و دیگر ضروری سہولیات میسر رکھی گئیں ہیں ،جس دوران فوری طور پر آکسیجن کو بروئے کار لاکر یاتریوں کی جان کو بچایا جا رہا ہے ،تاہم بعض یاتری آکسیجن کی کمی کا شکار ہو کر اچانک فوت ہو جاتے ہیں۔

سرکاری اعداد وشمار کے مطابق اب تک، 3 لاکھ سے زیادہ یاتریوں نے شیو لنگ کا درشن کیا۔واضح رہے کہ 62 روزہ سالانہ امرناتھ یاترا کا آغاز یکم جولائی کو ضلع اننت ناگ کے پہلگام اور گاندربل ضلع کے بالتال کے جڑواں راستوں سے ہوا۔ یاترا 31 اگست کو اختتام پذیر ہوگی۔