جنوبی کشمیر کے بالائی علاقوں میں برفباری جبکہ میدانی علاقوں میں بارش

محکمہ موسمیات کی پیش گوئی کے عین مطابق وادی کشمیر میں جمعہ کی صبح سے پہاڑی علاقوں میں برف باری جبکہ میدانی علاقوں میں بارشوں کا سلسلہ شروع ہوا جس سے درجہ حرارت میں نمایاں گراوٹ درج ہوئی ہے۔Snowfall in Upper area Of Kashmir

اننت ناگ:جنوبی کشمیر کے میدانی علاقوں میں بارشوں اور پہاڑی علاقوں میں برفباری کا سلسلہ جمعرات کی شام سے ہی شروع ہوا، جس کے سبب درجہ حرارت میں کافی کمی واقع ہوئی ہے۔ محکمہ موسمیات کی عین پیشن گوئی کے مطابق بالائی علاقوں میں ہلکی برفباری جبکہ میدانی علاقوں میں بارشوں کا سلسلہ شروع ہوا۔

پیر پنچال کے پہاڑی علاقوں جن میں سنتھن ٹاپ، مرگن ٹاپ، اور مشہور سیاحتی مقام پہلگام کے پہاڑی علاقوں میں کل شام سے ہی ہلکی برفباری ہو رہی ہے جبکہ میدانی علاقوں میں بارشوں کا سلسلہ شروع ہوا۔ جس کی وجہ سے وادی میں سردی کی لہر میں اضافہ ہوا ہے۔

محکمہ موسمیات کے ایک ترجمان کے مطابق وادی میں 11 نومبر کی صبح سے موسم میں بہتری درج ہونے کا امکان ہے اور بعد ازاں 17 نومبر تک موسم خشک رہنے کی توقع ہے۔ انہوں نے کہا کہ اس دوران درجہ حرارت میں بھی بہتری درج ہونے کا امکان ہے۔

مسلسل برف باری کے باعث جہاں جنوبی کشمیر کے ضلع شوپیاں کو صوبہ جموں کے پونچھ اور راجوری اضلاع کے ساتھ جوڑنے والا تاریخی مغل روڈ جہاں گذشتہ روز سے ہی بند ہے وہیں کشتواڑ – اننت ناگ روڈ پر بھی ٹریفک کی نقل و حمل بند کر دی گئی ہے۔

ادھر ضلع انتظامیہ کپوارہ نے ناساز موسمی صورتحال کے پیش نظر ایک ایڈوائرزی جاری کرتے ہوئے عوام خاص کر کیرنم کرناہ، مژھل، بڈنمال، جمگنڈ، نوگام، کمکڈی اور دریائوں اور ندی نالوں کے نزدیک رہنے والے لوگوں سے کہا ہے کہ وہ موسم بہتر ہونے تک ان علاقوں میں جانے سے گریز کریں جہاں مٹی کے تودے گرنے کے خطرات رہتے ہیں۔