Anantnag Demolition Drive: اننت ناگ میں 6 اسٹون کریشرز کے خلاف انہدامی کارروائی

جنوبی کشمیر کے اننت ناگ ضلع میں کاہچرائی اور روشنی لینڈ سمیت سرکاری اراضی پر تعمیر کیے گئے کمرشل ڈھانچوں کو منہدم کرکے اراضی کو حکومتی تحویل میں لینے کا سلسلہ تیز رفتاری کے ساتھ جاری ہے۔ Six Stone Crusher Units Demolished in Anantnag

اننت ناگ: ضلع انتظامیہ اننت ناگ نے کاہچرائی اور سرکاری اراضی پر کام کرنے والے مختلف اسٹون کرشرز کے خلاف بڑے پیمانے پر انہدامی کارروائی انجام دی۔ ضلع میں گزشتہ کئی روز سے ’’با اثر لوگوں کے خلاف وسیع پیمانے پر غیر قانونی قبضہ کو ہٹانے کی مہم میں تیزی‘‘ لائی گئی ہے۔ انتظامیہ کے مطابق انجام دی گئی انہدامی کارروائی بھی اسی کڑی کا ایک حصہ ہے۔

محکمہ مال کے ایک سینئر افسر کے مطابق متعدد تجارتی اداروں کی نشاندہی پہلے ہی کی گئی ہے جنہوں نے غیر قانونی طریقہ سے سرکاری اراضی کو ہڑپ کر اسے اپنے کاروباری مفاد کے لئے استعمال کر رہے ہیں۔ انہوں نے ایسے تمام لوگوں سے اپیل کی کہ وہ از خود سرکاری اراضی کو حکومت کے حوالے کریں، ایسا نہ کرنے کی صورت میں ان کے خلاف اسی طرح کی قانونی کارروائی عمل میں لائی جائے گی۔

تجاوزات کے خلاف جاری مہم کے تحت نیپورہ، اننت ناگ میں 5 اسٹون کرشر یونٹس کے خلاف کارروائی عمل میں لائی گئی، جس دوران بلڈوزر کے ذریعہ ڈھانچوں کو ہٹا کر انتظامیہ نے زمین اپنی تحویل میں لے لی۔ انتظامیہ کے مطابق مذکورہ اسٹون کریشر مالکان کو کچھ روز پہلے ہی نوٹس بھیجا گیا تھا، جس کے بعد بدھ کے روز سے با ضابطہ طور ان کے خلاف انہدامی کارروائی شروع کی گئی۔

محکمہ مال کے مطابق انہدامی کارروائی کے دوران 50 کنال اراضی کو غیر قانونی قبضہ سے آزاد کیا گیا جو سرینگر جموں شاہراہ کے قریب تھی، جس کی مالی قیمت 20 کروڑ روپے سے زیادہ بتائی جا رہی ہے۔ اس دوران ڈسٹرکٹ مینرل محکمہ کی ٹیم بھی موقع پر موجود تھیں جنہوں نے کریشرز کو اپنے قبضہ میں لے لیا۔ حکام کا کہنا ہے کہ 5 اسٹون کرشرز - جن میں سے 3 مکمل طور پر سرکاری زمین پر قائم تھے کو ایک ہفتے کی مہلت دی گئی تھی کہ وہ جائے وقوعہ سے مشینری ہٹائیں جس میں ناکامی پر مشینریز کو بھی قبضے میں لے لیا گیا۔

اسی طرح قاضی گنڈ میں بھی ایک اور اسٹون کرشر کے خلاف کارروائی کی گئی جو مبینہ طور سرکاری زمین پر کام کر رہا تھا۔ جہاں تحصیل قاضی گنڈ کی ریونیو ٹیم نے 14 کنال اراضی واپس قبضہ میں لے لی۔ انتظامیہ کا کہنا ہے کہ اننت ناگ ضلع میں انہدامی مہم میں تیزی لاتے ہوئے ایک روز کے اندر 2700 کنال سرکاری اراضی کو بازیاب کیا گیا ہے۔