فوج نے بزرگ کے لیے آشیانہ بنایا

گجر بکروال طبقہ سے تعلق رکھنے والے غریب بزرگ محمد رفیق چوپان کے لیے وائلو میں فوج کی جانب سے ایک پناہ گاہ کا قیام عمل میں لایا گیا ہے۔

اننت ناگ کے کوکرناگ میں واقع وائلو میں قائم 19 آر آر کی دلیر کمپنی کی جانب سے کھلے آسمان کے نیچے زندگی گزر بسر کرنے والے بزرگ شہری کے لئے رہنے کے لئے ایک پناہ گاہ بنائی گئی ہے۔

وادی کشمیر میں اس وقت شدید سردی نے دستک دے دی ہے۔ جس کے چلتےعام شہریوں نے اس سردی سے نمٹنے کی تیاریاں کرلی ہیں، وہیں یہاں کچھ افراد ایسے بھی ہیں جو ابھی بھی مفلوک الحال کی زندگی گزارنے پر مجبور ہیں۔ ان کے پاس نہ کھانے کے لئے نہ اوڑھنے کے لئے اور نہ ہی رہنے کے لئے کوئی جگہ میسر ہے۔ ایسے میں کئی بزرگ افراد سڑکوں پر کھلے آسمان کے تلے اپنی زندگی کی آخری سانسیں گن رہے ہیں۔

ایسے ہی غریب بزرگ شہری کے لئے وائلو میں فوج کی جانب سے ایک پناہ گاہ کا قیام عمل میں لایا گیا ہے۔ اس میں گجر بکروال طبقہ سے تعلق رکھنے والے غریب بزرگ محمد رفیق چوپان کی بنیادی رہائش گاہ تعمیر کرنے کے علاوہ بستر، کھانے پینے کی اشیاء، اور دیگر سہولیات بھی فراہم کی گئی ہے۔

ادھر وائلو کے لوگوں نے انیس آرآر کے دلیر کمپنی کی جانب سے اٹھائے گئے اس قدم کی کافی سراہانہ کی ہے۔