شیپ بریڈنگ ریسرچ فارم ڈکسم ترقی کی راہ پر گامزن

فارم کے عہدیدار آسٹریلین مرینو نسل کے جانوروں کو مقامی بھیڑ پالنے والے افراد کو کچھ عرصے کے لئے دیتے ہیں، جہاں پر ان کی کراس بریڈنگ کروائی جاتی ہے۔

ضلع اننت ناگ کے کوکرناگ میں سینٹرل شیپ بریڈنگ ریسرچ فارم قائم ہے۔ سنہ 1971 میں مرکزی حکومت کے تعاون سے یہاں شیپ بریڈنگ ریسرچ فارم کا قیام عمل میں لایا گیا۔ شیپ فارم کی تعمیر و تجدید کے لئے تقریباً 10 سال کا عرصہ لگا۔ دس سال گزرنے کے بعد 1981 میں پہلی مرتبہ فارم میں آسٹریلیا سے مرینو نسل کے بھیڑ بکریوں کو لایا گیا، تاکہ اچھی نسل کے بھیڑ پیدا کیے جائیں۔

فارم کے عہدیدار آسٹریلین مرینو نسل کے جانوروں کو مقامی بھیڑ پالنے والے افراد کو کچھ عرصے کے لئے دیتے ہیں، جہاں پر ان کی کراس بریڈنگ کروائی جاتی ہے۔ مذکورہ بریڈنگ فارم میں تقریباً 80 ملازمین کام کر رہے ہیں۔ شیپ بریڈنگ فارم وائلد لائف سینچری سے متصل ہے، اس لیے بھیڑوں کو جنگلی جانوروں سے محفوظ رکھنے کے لئے فارم میں ملازمین تعینات کیے گئے ہیں۔

شیپ بریڈنگ ریسرچ فارم میں تعینات ویٹرنری اسسٹنٹ سرجن ڈاکٹر ناصر منظور کا کہنا ہے کہ 'ہماری کوشش ہوتی ہے کہ ہم یہاں کراس بریڈنگ کروا کے زیادہ سے زیادہ اچھی نسل کے بھیڑوں کو تیار کروا سکیں، جس سے یہاں کے مقامی لوگوں کو فائدہ ہو'۔

ڈاکٹر ناصر کا کہنا ہے کہ اب اس کاروبار کے ساتھ تعلیم یافتہ افراد جڑ رہے ہیں، جس سے بےروزگار نوجوانوں کو روزگار کے مواقع فراہم ہو رہے ہیں۔

ایک ہزار کنال اراضی پر پھیلے ہوئے شیپ بریڈنگ ریسرچ فارم میں تعینات ڈپٹی ڈائریکٹر محمد اشرف کا کہنا ہے کہ وہ ڈکسم کے بریڈنگ ریسرچ فارم میں ایک اچھی نسل کے بھیڑوں کو تیار کرنے کی کوشش کرتے ہیں اور گزشتہ کئی دہائیوں سے وہ اس کوشش میں کافی حد تک کامیاب ہوگئے ہیں۔ انہوں نے کہا کہ وائلڈ لائف کا علاقہ اگرچہ الگ ہے لیکن پھر بھی کبھی کبھار کوئی حادثہ پیش آتا ہے، تو اسے محکمہ کے ملازمین سنبھال لیتے ہیں۔

شیپ بریڈنگ فارم کے ڈپٹی ڈائریکٹر کا کہنا ہے کہ رواں برس مذکورہ فارم میں 700 بھیڑوں کا اضافہ ہوا ہے جبکہ فارم میں کل ملا کر 1300 بھیڑ بکریاں موجود ہیں جنہیں پالنے کے لئے مذکورہ فارم میں تقریباً 80 ملازمین تعینات ہیں۔ انہوں نے نوجوانوں سے اپیل کی ہے کہ وہ اس پیشے کی جانب راغب ہوں، محکمہ اُنہیں ہر لحاظ سے مدد کرےگا۔