اننت ناگ: یوم آزادی کی تقریب سے قبل سکیورٹی کے سخت انتظامات

15 اگست کو یوم آزادی کی تقاریب کے پیش نظر جموں و کشمیر میں سیکورٹی کے سخت انتظامات کئے گئے ہیں۔

یوم آزادی کی تقریبات کو خوش اسلوبی کے ساتھ انجام دینے کیلئے جموں کشمیر کے دیگر اضلاع کے ساتھ ساتھ جنوبی کشمیر کے چاروں اضلاع میں حفاظت کے غیر معمولی انتظامات گئے ہیں۔

ضلع اننت ناگ میں بھی دیگر اضلاع کی طرح حساس علاقوں میں حفاظتی اہلکاروں کی اضافی نفری کو تعینات کیا گیا ہے۔ مشکوک افراد کی نقل و حرکت پر قریبی نظر رکھی جا رہی ہے، وہیں نجی و پبلک گاڑیوں سمیت موٹر سائیکل سواروں کی چیکنگ کی جا رہی ہے۔

واضح رہے کہ چند روز قبل ضلع کولگام کے ملپورہ، میر بازار میں سرینگر - جموں قومی شاہراہ پر عسکریت پسندوں کی جانب سے بی ایس ایف کانوائے کو نشانہ بنانے کے بعد عسکریت پسندوں نے اپنی موجودگی کا اظہار کیا تھا، جس کے سبب جنوبی کشمیر میں سکیورٹی کو مزید چوکس کیا گیا ہے۔

وہیں سرینگر کے شیر کشمیر اسٹیڈیم سرینگر اور مولانا آزاد اسٹیڈیم جموں کے گرد و نواح کے علاقوں کو فوجی چھاؤنی میں تبدیل کر دیا گیا ہے، اور سکیورٹی کو ہائی الرٹ کیا گیا ہے۔

عسکریت پسندوں کی جانب سے دراندازی کے واقعات رونما ہونے کے پیش نظر ایل او سی پر مزید فورسز تعینات کر دئے گئے ہیں، کسی بھی ناخوشگوار واقعے کو روکنے کے لئے فورسز کو چوبیس گھنٹے متحرک رہنے کے احکامات صادر کئے گئے ہیں، جبکہ شہر سرینگر میں فضائی نگرانی کیلئے ڈرون کا استعمال بھی عمل میں لایا جا رہا ہے۔