Rallies on Milad Across Kashmir: جنوبی کشمیر میں میلاد کی نسبت سے جلوس برآمد

وادی کشمیر میں عید میلاد النبی صلی اللہ علیہ وآلہ وسلم کی نسبت سے سب سے جنوبی کشمیر کے پلوامہ اور اننت ناگ اضلاع میں تقریب کے ساتھ ساتھ جلوس بھی برآمد کیے گئے۔

اننت ناگ / پلوامہ (جموں کشمیر) :عید میلاد النبی صلی اللہ علیہ وآلہ وسلم کے سلسلے میں جموں و کشمیر کے یمین و یسار میں تقاریب کا اہتمام کیا گیا۔ عید میلاد کی نسبت سے جنوبی کشمیر کے ضلع اننت ناگ کی بیشتر مساجد، خانقاہوں، عمارتوں اور شاہراہوں کو سبز پرچموں اور برقی قمقموں سے سجایا گیا تھا۔ عقیدت مندوں نے رات بھر خانقاہوں، مساجد اور بقعہ جات میں منعقدہ ذکر و اذکار، درود و مناجات، وعظ و نصیحت اور نعتیہ مجالس میں شرکت کی۔

جمعہ کو عید میلاد النبی ﷺ کی نسبت سے اننت ناگ ضلع کے ریشی بازار سے ایک جلوس برآمد کیا گیا جس میں ہزاروں کی تعداد میں عقیدت مندوں اور علمائے کرام نے شرکت کی۔ جلوس میں بچوں کو عورتوں اور خاصی تعداد بھی شامل رہی اور اپنے عقیدے کا اظہار کیا۔ جلوس قصبہ اننت ناگ کے مختلف بازاروں سے ہو کر زیارت شریف حضرت بابا حیدر ریشی رحمہ اللہ کے صحن میں پر امن طریقے پر اختتام ہوا۔ اس دوران آمد رسول ﷺ کا جشن منایا گیا اور پورے عالم اسلام کو مبارکباد پیش کی گئی۔ جلوس میں شامل عقیدت مندوں نے آقائے نامدار حضرت محمد ﷺ کی آمد کو پوری قاینات کے لیے مبارک قرار دیا اور اور پر نم آنکھوں سے اللہ تعالیٰ سے گناہوں کی پناہ مانگتے ہوئے جلوس میں شرکت کی۔

ادھر، علمائے کرام نے رسول پاک ﷺ کی مبارک زندگی کے مفتی گوشوں پر روشنی ڈالی اور انکی دنیا میں آمد کو پوری کائینات کےلیے مبارک قرار دیا۔ ای ٹی وی بھارت کے ساتھ بات کرتے ہوئے علماء کرام نے کہا کہ ’’موجودہ دور میں حضور صلی اللہ علیہ وسلم کی تعلیمات پر عمل کرنے کی اہم ضرورت ہے۔‘‘ انہوں نے مزید کہا کہ ’’اس وقت معاشرے میں طرح طرح کی رسم و رواج اور بدعات پھیل گئی ہیں، جن کو دور کرنے کے لیے ہم سب کو آگے آنا چاہیے اور حضورﷺ کی تعلیمات پر عمل کرکے ان بدعات سے ہم خود کو اور اپنے بچوں کو محفوظ رکھ سکتے ہیں۔‘‘ میلاد کے موقع پر کشمیر میں امن و امان و بھائی چارے کے لئے خصوصی دعا کی گئی۔

پلوامہ میں میلاد کی نسبت سے جلوس برآمد

جنوبی کشمیر کے ضلع پلوامہ میں بھی رہمو، مورن، کاکاپورہ سمیت دیگر کئی مقامات پر عید میلاد النبی صلی علیہ وسلم کے سلسلہ میں جلوس برآمد کیے گئے۔ قصبہ پلوامہ میں برآمد کی گئی ریلی میں کم عمر بچوں کی خاصی تعداد نے شرکت کی۔ اس موقع پر روح پرور مناظر دیکھنے کو ملے۔ ریلی میں شامل بچوں نے اس موقع پر حضور پُرنور صلی اللہ علیہ وسلم پر درود و سلام پیش کیے جبکہ حضور صلی علیہ وسلم کی مدح میں نعت خوانی بھی کی۔