کورونا کے خطرات کے بیچ امرناتھ یاترا کی تیاریاں شروع

کورونا وائرس کے خدشات و خطرات کے بیچ جموں و کشمیر انتظامیہ نے امرناتھ گوفہ کی طرف جانے والے راستے پر صاف و صفائی کا آغاز کردیا ہے، جس سے یاترا کے شروع ہونے کا قوی امکان لگتا ہے۔

سیاحتی مقام پہلگام جو ابھی کورونا وائرس سے پاک ہے لیکن جموں کشمیر حکومت کی جانب سے 15 روزہ امرناتھ یاترا شروع کرنے کا ایک حکمنامہ جاری کیا ہے۔

اس حکمنامے کو عملی جامہ پہنانے کے لیے دو روز قبل جنوبی ضلع اننت ناگ میں لیفٹننٹ گورنر کے مشیر بصیر احمد خان کی صدارت میں ایک اعلیٰ سطحی میٹنگ کا اہتمام کیا گیا۔

میٹنگ میں یاترا کے لیے ٹریک کلیرنس (صاف صفائی) و دیگر انتظامات سمیت سکیورٹی جیسے امور پر تبادلہ خیال ہوا۔
میٹنگ کے دوران فسران کو وبا پر قابو پانے کی غرض سے ماس ٹیسٹنگ و دیگر اقدامات اٹھانے کی ہدایت دی گئی۔ میٹنگ میں ڈی سی اننت ناگ کلدیپ کمار سدھا و دیگر افسران بھی موجود تھے۔
اگرچہ حکومت نے ابھی تک امرناتھ یاترا کے سلسلے میں تاریخ کا اعلان نہیں کیا ہے تاہم پہلگام ڈیولپمنٹ اتھارٹی انتظامیہ نے امرناتھ یاترا کی تیاریاں شروع کر دی ہیں۔ جس کے تحت امرناتھ ٹریک کو چندنواری سے گوفہ تک کے راستے کو صاف کرنے کا کام شروع کیا گیا۔