پہلگام: خستہ حال سڑک پر سیاحوں کی حکومت پر نکتہ چینی

خوبصورت سیاحتی مقام پہلگام میں چندن واڑی کے راستے سے ہی یاتری امرناتھ گپھا کی جانب روانہ ہوتے ہیں، تاہم اس سڑک کی ابتر حالت سے نہ صرف مقامی باشندوں بلکہ سیاحوں کو بھی کافی دقتوں کا سامنا کرنا پڑتا ہے۔

ضلع اننت ناگ سے پہلگام تک اگرچہ سڑک کی حالت قدرِ بہتر ہے لیکن پہلگام سے چندن واڑی تک کا سفر سڑک کی ابتر حالت سے کافی مشکل بن جاتا ہے۔

پہلگام سے چندن واڑی جانے والی سڑک پر اکثر مقامات پر گہرے گڑھے بن گئے ہیں جن میں جمع گندہ پانی مقامی آبادی کے لیے باعث عذاب بن چکا ہے۔

حکام کی جانب سے امرناتھ یاترا کو محفوظ، یاتریوں کے لیے آرام دہ بنانے کے حوالے سے بلند و بانگ دعوے کئے جا رہے ہیں لیکن چندن واڑی کی سڑک کا مشاہدہ کرنے سے معلوم ہوتا ہے کہ انتظامیہ کو ابھی بھی بہت کچھ کرنا باقی ہے۔

خستہ حال سڑک کے حوالے سے پہلگام کی سیر و تفریح پر آئے سیاحوں نے کہا: ’’سیاحوں اور یاتریوں کے لیے انتظامات کے حوالے سے کوتاہی رہ گئی ہے۔‘‘

سیاحوں کا کہنا ہے کہ ’’کشمیر کا سب سے خوبصورت مقام پہلگام ہے، ہم اس مقام کو کبھی نہیں بھول پائیں گے۔''

تاہم سڑکوں کے حوالے سے انہوں نے کہا کہ ’’پہلگام سے چندن واڈی تک کی سڑک بہت خراب ہے اور حکومت کو اس سڑک کی مرمت کرنی چاہئے کیونکہ امرناتھ گھپا کا مرکزی راستہ یہیں سے گزرتا ہے۔‘‘