اننت ناگ میں قومی لوک عدالتوں کا انعقاد

جنوبی کشمیر کے ضلع اننت ناگ میں لوک عدالتوں کے دوران ہزاروں کیسز کا موقع پر ہی نپٹارہ کیا گیا۔

ضلع اننت ناگ کے ڈسٹرکٹ کورٹ کمپلیکس اور اس کے ماتحت تمام تحصیل عدالتوں میں نیشنل لوک عدالتوں کا انعقاد کیا گیا، جس کی صدارت پرنسپل ڈسٹرکٹ اینڈ سیشن جج و چیئرمین ڈسٹرکٹ لیگل سروسز اتھارٹی اننت ناگ نصیر احمد ڈار نے کی۔

لوک عدالت کے دوران 7 ہزار 7 سو چودہ مقدمات میں سے 6 ہزار 1سو سترہ کیسز کو موقع پر ہی نپٹایا گیا، ان تمام معاملات کو لوک عدالت کے دوران قائم کئے گیے آٹھ بینچز نے سنوائی کی۔

اس موقع پر زیادہ تر بینک قرضہ جات کی وصولی، بجلی پانی سے جڑے معاملات کو لے کر لاکھوں کی رقم جرمانہ کے طور وصول کرکے معاملات کو موقع پر ہی حل کیا گیا۔

پرنسپل ڈسٹرکٹ اینڈ سیشن جج و چیئرمین ڈسٹرکٹ لیگل سروسز اتھارٹی اننت ناگ نصیر احمد ڈار نے کہا کہ نیشنل لوک عدالتوں کے انعقاد کا مقصد قابل مصالحت مجرمانہ کیسز، جائیداد، عائلی و ازدواجی زندگی کے مسائل، گھریلو تنازعات، بینک لین دین، پانی بجلی کی بلز سے جڑے معاملات کو افہام و تفہیم کے ذریعے موقع پر ہی حل کرنا ہے۔

انہوں نے کہا کہ لوک عدالتوں کے ذریعے لوگوں کے معاملات مفت اور جلدی حل ہو جاتے ہیں۔

پرنسپل ڈسٹرکٹ اینڈ سیشن جج نے لوگوں سے لوک عدالتوں سے زیادہ سے زیادہ استفادہ حاصل کرنے کی اپیل کی۔