'وادی میں باصلاحیت نوجوانوں کی کمی نہیں ہے'

نظیر احمد نے کہا کہ 'وادی میں باصلاحیت نوجوانوں کی کمی نہیں ہے لیکن فور جی انٹرنیٹ کی عدم دستیابی سے یہاں کے ہونہار نوجوانوں کی پڑھائی متاثر ہو رہی ہے'۔

راجیہ سبھا ممبر نظیر احمد لاوے نے ضلع اننت ناگ کے کوکرناگ کا دورہ کیا۔ وہ حال ہی میں، آئی اے ایس کا امتحان پاس کرنے والے طالب علم سبزار احمد گنائی کے گھر واقع گیبوم کوکرناگ گئے۔ جہاں انہوں نے سبزار اور ان کے اہل خانہ سے ملاقات کر کے انہیں مبارکباد پیش کی۔

لاوے نے کہا کہ غربت کے باوجود سبزار احمد نے اپنی محنت اور لگن سے ثابت کیا کہ حوصلے بلند ہوں تو کوئی بھی کمزوری کامیابی کے راستے میں رکاوٹ نہیں بن سکتی۔ والدین کی حوصلہ افزائی اور ان کے تعاون سے سبزار اس منزل تک پہنچنے میں کامیاب ہو گئے ہیں۔ سبزار نے ہم سب کا سر فخر سے اونچا کیا ہے۔

انہوں نے کہا کہ سبزار کے کارنامے سے وہ بہت خوش ہیں ان کی وجہ سے نہ صرف اس علاقہ کا بلکہ پوری ریاست کا نام روشن ہوا ہے۔

لاوے نے کہا کہ وادی میں باصلاحیت نوجوانوں کی کمی نہیں ہے لیکن فور جی انٹرنیٹ کی عدم دستیابی سے یہاں کے ہونہار نوجوانوں کی پڑھائی متاثر ہو رہی ہے۔ انہوں نے کہا کہ دور حاضر میں فورجی سہولیت وقت کی اہم ترین ضرورت ہے۔ لہذا وہ یہ معاملہ، لیفٹیننٹ گورنر اور وزیر اعظم کے ساتھ ضرور اٹھائیں گے۔