Accident in Pahlagam پہلگام سڑک حادثے میں موٹر سائیکل سوار ہلاک، دو دیگر زخمی

پہلگام کے لدرو علاقہ میں ایک موٹر سائیکل اور ایک ٹپر گاڑی کے درمیان ٹکر ہونے سے موٹر سائکل سوار ہلاک جب کہ دو دیگر لوگ زخمی ہوگئے۔ متوفی کی شناخت منظور احمد بٹ کے طور پر ہوئی ہے۔

پہلگام :سیاحتی مقام پہلگام کے لدرو علاقہ میں پیر کے روز ایک سڑک حادثہ میں ایک موٹر سائیکل سوار ہلاک جب کہ دو دیگر زخمی ہوگئے۔ متوفی کی شناخت منظور احمد بٹ کے طور پر ہوئی ہے۔ تفصیلات کے مطابق ایک ٹپر گاڑی جس کی رجسٹریشن نمبر JK 13C 0290 اور ایک موٹر سائیکل سوار رجسٹریشن نمبر JK03K –1852 کے درمیان لدرو پہلگام میں آپسی ٹکر ہونے سے موٹر سائیکل سوار شدید زخمی ہوگیا ہے جبکہ دو دیگر لوگ اس حادثہ میں زخمی ہوگئے۔

زخمیوں کو فوری طور پی ایچ سی پہلگام منتقل کیا گیا جہاں موٹر سائکل سوارمنظور احمد بھٹ زخمیوں کی تاب نہ لاتے ہوئے دم توڑ دیا۔ زخمیوں کی شناخت عبدالاحد میر اور رؤف احمد بٹ کے طور پر ہوئی ہے۔ تمام زخمی افراد کراشن گام عشمقام علاقہ کے رہائشی ہیں۔ پولیس نے اس حوالے سے کیس درج کرکے تحقیقات شروع کر دی ہے۔

واضح رہے کہ ملک بھر میں سڑک حادثات کی وجہ سے ہزاروں افراد اپنی قیمتی جانیں گنوا رہے ہیں اور ہزاروں افراد سڑک حادثات میں شدید زخمی ہونے کی وجہ سے معذوری کی زندگی گزارنے پر مجبور ہیں۔ سڑک حادثات کی اہم وجوہات میں لاپرواہی سے گاڑی چلانا، نشہ کی حالت میں گاڑی چلانا، انتہائی تیز رفتاری سے گاڑی چلانا وغیرہ شامل ہیں۔ متعلقہ محکمہ کی جانب سے آئے روز اس ضمن میں شعور بیداری مہم بھی چلائی جاتی ہے۔ ہائی ویز پر جگہ جگہ ڈرائیورنگ کے دوران احتیاط برتنے کی ہدایات پر مبنی بورڈ لگائے گئے ہیں لیکن اس کے باوجود سڑک حادثات میں کمی کے بجائے دن بہ دن اضافہ ہی ہوتا جارہا ہے۔