کووڈ ٹیسٹنگ کی رفتار بڑھانے کے لئے لیب عملہ مزید متحرک

جی ایم سی اننت ناگ، آر ٹی پی سی آر لیب کا عملہ مزید متحرک روزانہ دو ہزار سے زائد ٹیسٹ کئے جا رہے ہیں۔

جموں وکشمیر کے ضلع اننت ناگ میں عالمی مہلک وبا کورونا وائرس سے نمٹنے کے لئے اننت ناگ صحت انتظامیہ مزید متحرک ہوگیا ہے۔ کورونا وائرس کے بڑھتے پھیلاؤ کو روکنے کے لئے صحت انتظامیہ کی جانب سے ٹیسٹ کرنے کے سلسلہ میں تیزی لائی گئی ہے۔

اسپتال انتظامیہ کے مطابق گورنمنٹ میڈیکل کالج اننت ناگ (جی ایم سی) کی، آر ٹی پی سی آر لیب میں روزانہ دو ہزار سے زیادہ کووڈ19 ٹیسٹ کئے جا رہے ہیں۔

جنوبی کشمیر کے تین اضلاع، کولگام، اننت ناگ ،شوپیاں سے روزانہ دو ہزار سے زائد افراد کی جانچ کے نمونے حاصل کئے جا رہے ہیں۔

انہیں جی ایم سی، آر ٹی پی سی آر لیب میں ٹیسٹ کے لئے روانہ کیا جارہا ہے۔

زیادہ سے زیادہ ٹیسٹ کرانے کے لئے لیب کو جدید سہولیات سے لیس کیا گیا ہے۔ لیب میں موجود ڈاکٹر اور لیب ٹیکنیشنز ٹیسٹنگ کی رفتار کو بڑھانے کے لئے تن دہی سے کام کر رہے ہیں اور ڈیوٹی شیڈول کے علاوہ فاضل اوقات میں بھی اپنے فرائض انجام دے رہے ہیں ۔