Meri Mati Mera Desh Inaugurated: اننت ناگ میں 'میری ماٹی میرا دیش' پروگرام کا آغاز

جنوبی کشمیر کے اننت ناگ ضلع میں بھی جموں و کشمیر کے دیگر اضلاع کی طرح ’’میری ماٹی میرا دیش‘‘ پروگرام کی نسبت سے تقاریب کا آغاز کیا گیا۔

اننت ناگ (جموں و کشمیر):ضلع ترقیاتی کمشنر، اننت ناگ، سید فخرالدین حامد نے گورنمنٹ ہائر سیکنڈری اسکول دمحال میں ایک تقریب کے دوران ’میری ماٹی میرا دیش‘ مہم کا افتتاح کیا۔ اس تقریب کے بعد پروگرامز کی ایک سیریز کا آغاز ہوا جس کا مقصد ’’ملک کی خاطر اپنی جانوں کا نظرانہ پیش کرنے والے افراد کی شاندار قربانیوں کو یاد کرنا ہے اور انہیں خراج تحسین پیش کرنا ہے۔‘‘

ضلع ترقیاتی کمشنر کی زیر صدارت افتتاحی تقریب میں 200 سے زائد اسکولی بچوں اور مختلف محکموں کے عہدیداروں نے پروگرام میں شمولیت اختیار کی۔ انتظامیہ کے مطابق ’’میری ماٹی میرا دیش‘‘ مہم اُن تقریبات میں ایک خاص مقام رکھتی ہے، جو ملک کی تاریخ اور اس کی آزادی کے لیے اپنی جانیں قربان کرنے والوں کو اجتماعی خراج عقیدت کی علامت ہے۔ تقریب کے دوران حاضرین سے خطاب کرتے ہوئے ڈی سی اننت ناگ، سید فخرالدین حامد، نے پروگارم کی اہمیت پر روشنی ڈالی۔ انہوں نے کہا کہ ’’یہ مہم ضلع بھر میں سلسلہ وار تقریبات کے ذریعے ملک کے لئے جانیں قربان کرنے والے افراد کو خراج عقیدت پیش کیا جائے گا۔‘‘

انہوں نے مزید کہا کہ یہ مہم 9 اگست سے 15 اگست تک جاری رہے گی جو مختلف سرگرمیوں پر مشتمل ہوگی۔ ضلع بھر کے پنچایت گھروں میں یادگاری تختیاں لگائی جائیں گی جس میں ان افراد کو خراج عقیدت پیش کیا جائے گا جنہوں نے قوم کی بے لوث خدمت کی ہے۔ ڈی سی اننت ناگ نے کہا کہ اس مہم ہر پنچایت اور وارڈ میں 75 پودے لگا کر ماحولیاتی نظام کو محفوظ رکھنے کا پیغام دیا جائے گا۔ تعلیمی ادارے، بشمول ڈگری کالجز اور اسکول، تخلیقی مقابلوں کی میزبانی میں اہم کردار ادا کریں گے جو مضامین، ڈرائنگ، پینٹنگز، فوٹو گرافی اور ویڈیو گرافی کے ذریعے قوم کے بہادروں کو خراج عقیدت پیش کریں گے۔

ڈی سی اننت ناگ نے ’’میری ماٹی میرا دیش‘‘ مہم کی کامیابی پر اعتماد کا اظہار کرتے ہوئے اس اقدام کو عملی جامہ پہنانے میں تمام اسٹیک ہولڈرز کے معقول تعاون کو اجاگر کیا۔ ڈی سی نے اس یادگار مہم کے انعقاد میں تمام افسران و اہلکاروں کی لگن کو سراہا اور عوام سے بھرپور شرکت کی اپیل کی۔