محبوبہ مفتی نے والد کی قبر پر حاضری دی

پی ڈی پی صدر محبوبہ مفتی نے جموں و کشمیر کے ضلع اننت ناگ کے بجبہاڑہ علاقے میں واقع دارا شکوہ پارک میں اپنے والد مرحوم مفتی محمد سعید کی مقبرہ پر حاضری دی۔

پی ڈی پی صدر نے کہا کہ جموں و کشمیر کے لوگوں کو جو پریشانیاں اور مشکلات پیش آرہی ہیں ان تمام باتوں کو 24 جون کو مرکزی حکومت کے روبرو پیش کریں گے۔

انہوں نے کہا کہ 'میں چاہتی تھی کہ جو سیاسی قیدی ہیں یا عام نوجوان ہیں انہیں رہا کیا جائے۔ جن لوگوں پر سنگین الزامات ہیں اگر آپ انہیں رہا نہیں کر سکتے تو کم از کم اُن قیدیوں کو وادی کی جیلوں میں منتقل کیا جائے۔

محبوبہ مفتی نے مزید کہا کہ 'جس طرح سے مرکزی حکومت اور مین اسٹریم پارٹیوں کے درمیان بات چیت کا عمل شروع ہوا ہے، ہم چاہتے ہیں کہ یہ سلسلہ آگے بڑے۔ ہم کوئی ایسا کام نہیں کرنا چاہتے جس کی وجہ سے بات چیت کے عمل پر منفی اثرات مرتب ہوں۔