عسکریت پسندوں سے قومی دھارے میں شامل ہونے کی اپیل

بھارتیہ جنتا پارٹی کے یو ٹی نائب صدر صوفی محمد یوسف نے پارٹی لیڈر غلام رسول ڈار اور انکی اہلیہ جواہرہ کی عسکریت پسندوں کے ہاتھوں قتل پر شدید الفاظ میں مذمت کی ہے۔

گذشتہ روز ضلع اننت ناگ کے لال چوک علاقہ میں سپورٹس اسٹیڈیم کے قریب عسکریت پسندوں نے بی جے پی سرپنچ اور اس کی اہلیہ پر فائرنگ کی جس کے نتیجے میں دونوں میاں بیوی موقع پر ہی ہلاک ہو گئے۔

تفصیلات کے مطابق پیر کی سہ پہر نا معلوم بندوق برداروں نے ضلع کولگام سے تعلق رکھنے والے بی جے پی کے سرپنچ اور اس کی اہلیہ پر فائرنگ کی جس کے نتیجے میں دونوں میاں بیوی شدید طور پر زخمی ہو گئے۔ زخمی حالت میں دونوں کو جی ایم سی اننت ناگ منتقل کیا گیا جہاں ڈاکٹروں کی ٹیم نے انہیں مردہ قرار دے دیا۔


صوفی یوسف نے سرپنچ اور ان کی اہلیہ کی موت پر ناراضگی کا اظہار کرتے ہوئے کہاکہ یہ ہلاکتیں لاحاصل ہیں اور اسے بی جے پی کے حوصلے پست نہیں ہون گے۔ انہوں نے کہا کہ بی جے پی کے ساتھ کشمیری عوام جڑ رہی ہیں۔ صوفی کے مطابق بھارتی جنتا پارٹی کا ہر کارکن عسکریت پسندوں کے خلاف کام کرتا رہے گا۔

انہوں نے عسکریت پسندوں سے ہتھیار چھوڑ کر قومی دھارے میں شامل ہونے کی اپیل کرتے ہوئے کہاکہ بی جے پی ایسے نوجوان کو قومی دھارے میں شامل ہونے کے ساتھ ساتھ ان کے باز آباد کاری میں بھی انکا خاص خیال رکھے گی۔ عسکریت پسندوں کو چاہیے کہ ہتھیار چھوڑ کر مین اسٹریم میں آجائے'۔