عید الفطر کے موقع پر بھی عید گاہیں ویران!

عالمی وبا کورونا وائرس کے پھیلاؤ اور لاک ڈاؤن کے پیش نظر اس بار عید الفطر کے موقعے پر عیدگاہیں ویران نظر آئیں۔ لوگوں نے عید کی نماز گھروں میں اپنوں کے ساتھ ہی ادا کی۔

اننت ناگ: عالمی وبا کورونا وائرس کی دوسری لہر پہلے سے کہیں زیادہ مہلک اور خطرناک ثابت ہو رہی ہے۔ گذشتہ کئی دنوں سے نئے مریضوں کی تعداد تین لاکھ سے زیادہ ریکارڈ کی جارہی ہے۔ جبکہ گذشتہ 24 گھنٹے کے دوران ہلاک ہونے والوں کی تعداد 4 ہزار سے تجاوز کرگئی ہے۔

نئے مریضوں کی تعداد میں اضافے کو دیکھتے ہوئے متعدد ریاستوں میں لاک ڈاؤن، جزوی لاک ڈاؤن یا نائٹ کرفیو نافذ ہے۔ اسی طرح جموں و کشمیر میں بھی لاک ڈاؤن نافذ ہے، لاک ڈاؤن کے سائے میں دوسری عیدالفطر کی نماز بھی محلے کی مسجدوں اور گھروں میں ہی ادا کی گئی۔ اس دوران عیدگاہیں ویران نظر آئیں۔

جموں و کشمیر انتظامیہ کی جانب سے عیدگاہوں میں نماز عید پر پابند عائد کی گئی تھی۔ جس کی وجہ سے مسجدیں اور خانقاہیں عید کی نماز کے لیے بند رہیں۔

واضح رہے کہ پاکستان، افغانستان سمیت جموں و کشمیر میں آج ہی عید الفطر کی نماز ادا کی گئی، جبکہ بھارت، بنگلہ دیش سمیت متعدد ایشیائی ممالک میں عیدالفطر کی نماز جمعہ کے روز ادا کی جائے گی۔