'بندوق کسی بھی مسئلہ کا حل نہیں'

جموں و کشمیر کی سابق وزیر اعلی اور پیپلز ڈیموکریٹک پارٹی کی صدر محبوبہ مفتی نے دفعہ 370 کی تنسیخ کے بعد منگل کے روز پہلی بار اننت ناگ میں پارٹی کارکنان کے ساتھ ایک اجلاس منعقد کیا۔

اننت ناگ کے ڈاک بنگلو کھنہ بل میں منعقدہ پی ڈی پی کے اجلاس میں پارٹی کے کئی سرکردہ رہنماؤں سمیت کثیر تعداد میں ورکرس نے شرکت کی۔

اس موقع پر میڈیا سے بات کرتے ہوئے محبوبہ مفتی نے کہا کہ خطہ میں امن و استحکام کو بحال کرنے کے لیے مسئلہ کشمیر کو پُر امن طریقہ سے حل کرنا ضروری ہے۔ انہوں نے کہا کہ خون خرابہ سے کوئی بھی مسئلہ حل نہیں ہو سکتا۔

محبوبہ مفتی نے کہا کہ کسانوں کی تحریک سے ہمیں سیکھنا چاہئے کہ کس طرح پُر امن طریقہ سے اپنے مطالبات کو اجاگر کرنا چاہیے۔ انہوں نے لوگوں سے اپیل کرتے ہوئے کہا کہ وہ اپنے بچوں کو بندوق سے دور رکھیں کیونکہ بندوق سے صرف تباہی ہوتی ہے۔ اس سے کوئی مسئلہ حل نہیں ہو سکتا ہے۔

انہوں نے کہا کہ مسئلہ کشمیر ایک پیچیدہ مسئلہ ہے۔ لہذا مرکزی حکومت کو یہاں کے لوگوں، پاکستان اور چین کے ساتھ بات چیت کرنی چاہیے۔

انہوں نے دونوں ممالک کے درمیان سیز فائر کے حوالہ سے شروع کی گئی بات چیت کا خیر مقدم کرتے ہوئے کہا کہ یہاں کے لوگوں کے جذبات اور احساسات کو مدنظر رکھتے ہوئے بھارت اور پاکستان کو کشمیر مسئلہپر بات چیت کرنے کے لئے آگے آنا چاہئے۔