اننت ناگ: سربل کپرن حکومت کی عدم توجہی کا شکار

جنت نظیر وادی کشمیر میں قدرتی حُسن سے مالامال ایسے مقامات بھی موجود ہیں جو دنیا کی نظروں سے اوجھل ہیں، ایسی ہی ایک حسین جگہ ضلع اننت ناگ کے ویری ناگ میں موجود ہے، جسے سربل کپرن، کے نام سے جانا جاتا ہے۔

سربل ضلع صدر مقام اننت ناگ سے تقریباً 45 کلو میٹر کی دوری پر پیر پنجال کی سرسبز اور اونچی پہاڑیوں کے درمیان واقع ہے۔ مشہور مغل باغ ویری ناگ کی سیر و تفریح پر جانے والے اکثر سیاح سربل کی جانب روانہ ہونا چاہتے ہیں لیکن ڈیڈبل سے آگے راستہ نہ ہونے کی وجہ سے وہ آدھے راستہ سے ہی لوٹ جاتے ہیں۔ راستہ میں آنے والے مقام سربل کو قدرت نے اس قدر خوبصورتی سے سجایا ہے کہ یہاں آنے والے سیاحوں کا کبھی من نہیں بھرتا ہے اور وہ اس منفرد مقام پر زیادہ سے زیادہ وقت گزار کر لطف اندوز ہوتے ہیں۔

سربل کی شاداب وادی کے وسط میں ایک خوبصورت نہر رواں دواں ہے جو اس مقام کو مزید جاذب نظر بنا دیتی ہے۔ اونچی پہاڑیوں میں موجود پگھلتے گلیشیرز اور قدرتی چشموں کا صاف و شفاف پانی کا ملاپ اس جگہ سے ایسے گزرتا ہے جیسے دودھ کی نہر بہہ رہی ہو۔

اگرچہ ویری ناگ ڈیولپمنٹ اتھارٹی نے اس علاقہ کو اپنی تحویل میں لیا ہے لیکن ادارہ آج تک اس جگہ تک ایک کچا راستہ بھی تعمیر نہ کر سکا۔ مقامی لوگوں کا ماننا ہے کہ اگر اس علاقہ کو سیاحتی نقشہ پر لایا جائے گا تو شاید اس علاقہ کو وادی کشمیر کا سب سے زیادہ خوبصورت علاقہ مانا جائے گا، لیکن انتظامیہ کی عدم توجہی کی وجہ سے یہاں کے لوگ ناراض ہیں۔