ضلع ہسپتال اننت ناگ میں ایسوسی ایٹ ہسپتال بنا کر اسے گورنمنٹ میڈیکل کالج میں تبدیل کیا گیا۔ اسے جدید سہولیات سے لیس کیا گیا، لیکن انتظامیہ کی جانب سے جی ایم سی کی بیرونی جگہ پر توجہ نہیں دی جا رہی ہے۔
انتظامیہ کی غفلت کے سبب جی ایم سی کا بیشتر حصہ کار پارکنگ میں تبدیل کیا گیا ہے۔
اس کے سبب مریضوں اور تیمارداروں کو کافی مشکلات کا سامنا کرنا پڑ رہا ہے۔
ہسپتال کے احاطہ میں سینکڑوں گاڑیاں موجود رہنے سے چلنے پھرنے کی گنجائش کافی کم ہو گئی ہے۔
اس کے نتیجہ میں بیماروں کو ہسپتال میں داخل کرنے اور انہیں سرینگر ریفر کرنے کے دوران مشکلات پیش آ رہی ہیں۔
پیدل چلنے والے افراد کے لئے بھی رکاوٹیں حائل ہو رہی ہیں۔
مقامی لوگوں کا کہنا ہے کہ ہسپتال انتظامیہ کی جانب سے لوگوں کو گاڑیاں پارک کرنے کے لئے یا تو کھلی چھوٹ دی گئی ہے یا ہسپتال احاطہ کو آمدنی کا ذریعہ بنایا گیا ہے۔
کیونکہ گاڑیاں پارک کرنے والے افراد سے باضابطہ طور پر ٹکٹ کاٹ کر پیسے وصول کیے جاتے ہیں۔
لوگوں نے انتظامیہ سے فوری طور پر ہسپتال احاطہ کو خالی کر کے گاڑیوں کے لیے دوسری جگہ پارکنگ سہولت فراہم کرنے کا مطالبہ کیا۔