اننت ناگ:ماہ رمضان کے متبرک ماہ کے دوران جہاں مساجد میں نمازیوں کی کافی بھیڑ بھاڑ رہتی ہے، وہیں یہاں کی درگاہوں میں بھی عقیدت مندوں کی کثیر تعداد حاضری دے کر بارگاہ الہی میں سر بہ سجود ہوتے ہیں۔ضلع اننت ناگ کے عشمقام علاقہ کی بلند چوٹی پر موجود سخی زین الدین ولیؒ کی درگاہ بھی ایسے درگاہوں میں شمار ہوتی ہے جہاں سال کے بارہ مہینے عقیدت مندوں کی کثیر تعداد حاضری دیتی ہےْ اس درگاہ پر عقیدت مند بلا مذہب و ملت اپنی من کی مراد پانے کے لئے آتے ہیں جن میں نہ صرف مسلمان بلکہ غیر مسلم بھی شامل ہوتے ہیں.
مقدس ماہ رمضان کی جمعہ نماز پڑھنے کے لئے دور دور سے لوگ یہاں آکر نماز ادا کرتے ہیں۔اسی عقیدت اور مذہبی جذبہ کے ساتھ آج بھی لوگوں کی کثیر تعداد نے نماز جمعہ ادا کیا،جن میں مرد و زن بچے جوان اور بزرگ لوگ شامل تھے ۔نماز کے بعد جموں و کشمیر کے امن سلامتی کے لئے خاص دعائیں کی گئیں۔ای ٹی وی بھارت کے ساتھ بات کرتے ہوئے عقیدت مندوں نے کہا کہ وہ دور دراز علاقوں سے اس درگاہ پر نماز پڑھنے آتے ہیں کیونکہ اس مقدس اور پاک جگہ پر ان کی مرادیں پوری ہو جاتی ہیں۔عقیدت مندوں نے انتظامیہ سے اپیل کرتے ہوئے کہا کہ وہ ان خاص موقعوں پر تمام تر سہولیات کی فراہمی کو یقینی بنائیں۔