اننت ناگ:جنوبی کشمیر کےضلع اننت ناگ کے ڈورو بٹاگنڈ علاقہ میں ایک ریچھ کے حملے میں ایک طالب علم زخمی ہوا ہے۔زخمی طالب علم کو مقامی لوگوں نے فوری طور پر سب ڈسٹرکٹ ہسپتال منتقل کیا، جہاں ان کی ابتدائی مرہم پٹی کی گئی ہے۔ زخمی طالب علم کی کی شناخت احمد توصیف احمد خان ولد علی محمد خان کے طور پر ہوئی ہے۔ مقامی لوگوں نے ایل جی انتظامیہ سے متاثرہ کے لیے امداد کی اپیل کی۔
دریں اثناہ، شمالی کشمیر کے ماور ہندواڑہ میں ریچھ کے حملے میں تین افراد زخمی ہوئے جنہیں علاج ومعالجہ کی خاطر نزدیکی ہسپتال منتقل کیا گیا۔اطلاعات کے مطابق منگل کی سہ پہر کو ماور ہندواڑہ میں ریچھ اچانک نمودار ہوا اور تین افراد پر حملہ کرکے انہیں شدید طورپر زخمی کیا۔معلوم ہوا ہے کہ آس پاس موجود لوگوں نے زخمیوں کو طبی امداد کی خاطر نزدیکی ہسپتال منتقل کیا۔زخمیوں کی شناخت جاوید احمد پیر، بشیر احمد شیخ اور یوسف شیخ کے بطور کی گئی ہے۔دریں اثنا محکمہ وائلڈ لائف کی ٹیم فوری طورپر جائے موقع پر پہنچی اورریچھ کو پکڑنے کی خاطر جگہ جگہ پھندے نصب کئے۔