ڈی سی اننت ناگ کی ڈی ڈی سی ممبران کے ساتھ میٹنگ

فارسٹ رائٹس ایکٹ سے متعلق ضلع اننت ناگ کے ڈاک بنگلو کھنہ بل میں ایک اعلیٰ سطحی میٹنگ طلب کی گئی جس میں ضلع انتظامیہ کے اعلیٰ افسران سمیت نو منتخب ڈی ڈی سی ممبران نے بھی شرکت کی۔

ضلع ترقیاتی کمشنر اننت ناگ کے کے سدھا نے ڈاک بنگلو کھنہ بل میں نو منتخب ڈی ڈی سی اور بی ڈی سی ممبران کے ساتھ ایک میٹنگ منعقد کی۔ میٹنگ کا مقصد فارسٹ رائٹس ایکٹ کے تحت درجہ فہرست قبائلی اور پہاڑی رہائشیوں کے لئے مختلف کمیٹیاں تشکیل دینا تھا۔

اس موقع پر ڈی سی نے بلاک ڈیولپمنٹ افسران سے کہا کہ وہ ہر پنچایت سے 10 سے 15 ممبروں کے ساتھ فارسٹ رائٹس کمیٹیاں تشکیل دینے کے لئے گرام سبھا طلب کریں جس میں کم از کم دوتہائی ممبر شیڈول ٹرائب ہوں گے اور ایسے ممبروں میں سے ایک تہائی سے کم خواتین نہیں ہونی چاہئیں۔

میٹنگ میں مزید کہا گیا کہ فارسٹ رائٹس کمیٹی ایک چیئر پرسن اور سیکریٹری کے منتخب کرنے کے بارے میں فیصلہ کرے گی اور بعد ازاں سب ڈویژنل سطح کی کمیٹی سے آگاہ کرے گی۔

ڈی سی نے مختلف محکموں کے افسران کو ہدایت دی کہ وہ مختلف شعبہ جات کے تحت ایک جامع تشخیصی پروگرام تیار کریں اور پنچایتی سطح کے تحت آگاہی پروگرام منعقد کریں تاکہ ضرورت مند افراد مالی معاونت اور مختلف سرکاری اسکیموں کا فائدہ اٹھا سکیں۔