Shed gutted in Anantnag: اننت ناگ میں آگ کی واردات، شیڈ خاکستر، میوہ باغ کو جزوی نقصان

ضلع اننت ناگ کے مرہامہ علاقہ میں آگ کی ایک واردات میں عارضی رہائشی شیڈ خاکستر ہو گیا جبکہ آتشزدگی کے دوران ہائی ڈینسٹی باغ کو بھی جزوی نقصان پہنچا ہے تاہم آگ کی واردات میں کسی جانی نقصان کی کوئی اطلاع نہیں۔

اننت ناگ (جموں کشمیر) :جنوبی کشمیر کے ضلع اننت ناگ کے مرہامہ، اخراج پورہ علاقے میں پیر اور منگل کی درمیانی شب ایک عارضی رہائشی شیڈ میں آگ نمودار ہوئی، جس نے فوری طور پر پورے ڈھانچے کو اپنی زد میں لے لیا۔ آگ کی لپٹوں کو دیکھ کر مقامی لوگوں کی ایک کثیر تعداد آگ کی واردات کی جگہ پر پہنچ گئی اور فوری طور پر آگ کو بجھانے کی کارروائی شروع کر دی۔

لوگوں نے آگ بجھانے کے لئے اسپرے موٹرس کا استعمال کیا اور کافی مشقت کے بعد کچھ دیر بعد آگ پر قابو پا لیا گیا۔ اور آگ کو مزید پھیلنے سے روک دیا۔ بعد میں فائر اینڈ ایمرجنسی کا عملہ بھی واردات کی جگہ پہنچ گیا اور آگ کو پوری طرح قابو میں کر لیا گیا۔ خاکستر ہوا رہائشی کوارٹر ضلع اننت ناگ کے مرہامہ، اخراج پورہ کے رہائشی معروف احمد بٹ عرف مُرید ولد عبد الوہاب بٹ کے گؤ خانہ کی اوپری منزل میں لگی تھی، جس میں وہ رہائش پذیر تھے لیکن چند ہفتہ قبل انہوں نے مذکور رہائش کو چھوڑ دیا تھا۔ آگ کے دوران پہلی منزل میں موجود گاؤ خانہ سے مویشیوں کو باہر نکال کر بچا لیا گیا۔

آگ کی واردات میں اگرچہ کوئی جانی نقصان نہیں ہوا تاہم اس میں لاکھوں روپے مالیت کا نقصان ہو گیا۔ جبکہ مذکورہ عمارت کے متصل ایک مقامی شخص کے ہائی ڈینسٹی سیب کے باغ کو بھی جزوی نقصان پہنچا۔ آگ کی وجہ سے درجنوں میوہ درخت جھلس گئے ہیں جس کے سبب باغ مالک کو بھی نقصان پہنچا ہے۔ متاثرین نے سرکار سے معاوضہ کی اپیل کی۔ ادھر، آگ کی واردات کی وجوہات کا فوری طور پر پتہ نہیں چلا ہے۔