گزشتہ کئی برسوں سے فلموں کے علاوہ چھوٹے پردے کے پروڈکشن ہاوس بھی کشمیر کی جانب راغب ہو رہے تھے، تاہم دفعہ 370 کی منسوخی اور کووڈ 19 لاک ڈاون کی وجہ سے پیدا شدہ صورتحال کے بعد تمام تر سرگرمیاں بند ہو گئی تھیں جس سے نہ صرف سیاحتی صنعت کو نقصانات سے دوچار ہونا پڑا بلکہ روزگار کے وسائل پر بھی منفی اثرات مرتب ہو گئے تھے، تاہم اب حالات آہستہ آہستہ پٹری پر لوٹنے کے ساتھ ہی پروڈکشن ہاوسز نے دوبارہ یہاں کا رخ کرنا شروع کیا۔
عالمی شہرت یافتہ سیاحتی مقام پہلگام میں ان دنوں مختلف پروڈکشن ہاوسز ٹی وی سیریلز کی شوٹنگ میں مصروف نظر آرہے ہیں۔ چھوٹے پردے پر دکھائے جانے والے مختلف ٹی وی سیریلز کے لئے پہلگام کی خوبصورت برف پوش وادیوں میں عکس بندی کی جارہی ہے جس میں مقامی و غیر مقامی فنکار و اداکار اپنا رول نبھا رہے ہیں۔
پہلگام میں چھوٹے پردے کے لیے شوٹنگ جاری فلمسازوں کا کہنا ہے کہ انہیں برف پوش وادی میں شوٹنگ کرتے ہوئے بہت مزہ آرہا ہے۔ ان کا کہنا ہے کہ کشمیر شوٹنگ کے لیے بہترین اور موزوں جگہ ہے۔ کام کے ساتھ ساتھ وہ یہاں کے فطری حُسن سے بھی لطف اندوز ہو رہے ہیں۔ ان کا مزید کہنا ہے کہ وہ یہاں کے کلچر تہذیب اور مہمان نوازی سے کافی متاثر ہوئے ہیں۔ان کا کہنا ہے کہ کشمیر میں ہنرمند اور باصلاحیت نوجوانوں کی کمی نہیں ہے۔ یہاں کے نوجوان ہر شعبے میں اپنا لوہا منوانے کی بھرپور صلاحیت رکھتے ہیں۔تاہم نا مساعد حالات کی وجہ سے اکثر نوجوان اپنی صلاحیتوں کا مظاہرہ کرنے سے قاصر رہتے ہیں۔ یہاں شوٹنگ کرنے کا مقصد یہی ہے کہ یہاں کے نوجوانوں کو ایک بہتر پلیٹ فارم مہیا کیا جائے تاکہ وہ اپنی فنی صلاحیتوں کا مظاہرہ کرکے اپنے مستقبل کو تابناک بنا سکے۔ انہوں نے بالی ووڈ پروڈکشن ہاوسز کو کشمیر آنے کی اپیل کی۔
ان کا کہنا ہے کہ کشمیر میں چھوٹے اور بڑے پردے کی شوٹنگ سے نہ صرف نوجوانوں کو روزگار کے مواقع فراہم ہوں گے بلکہ اس طرح کی سرگرمیوں سے یہاں کی سیاحتی صنعت کو بھی تقویت ملے گی۔
