گاورن کوکرناگ رابطہ سڑک خستہ حالی کا شکار، مقامی ڈرائیور پریشان

جنوبی ضلع اننت ناگ کے کوکرناگ سے گاورن جانے والی سڑک مختلف مقامات پر خستہ حالی کا شکار ہے۔ سڑک تیز بارش اور برفباری کے سبب گہرے گڑھے میں تبدیل ہوگئی ہے جس کے نتیجے میں شاہراہ پر چلنے والی مسافر بردار گاڑیوں کو کافی مشکلات کا سامنا کرنا پڑ رہا ہے۔

مقامی لوگوں کا کہنا ہے کہ سڑک خستہ حالی کا شکار ہے، گزشتہ برس پردھان منتری گرام سڑک یوجنا اسکیم کے تحت مذکورہ سڑک پر تارکول بچھایا گیا تھا لیکن کچھ ماہ کے بعد ہی رابطہ سڑک پر بچھایا ہوا تارکول اکھڑ گیا جس کے باعث سڑک کے مختلف مقامات پر گہرے گڑھے بن گئے جن میں بارش کا پانی جمع ہونے سے لوگوں کو چلنے پھرنے میں کافی مشکلات کا سامنا کرنا پڑ رہا ہے۔

علاقے کے ڈرائیوروں کا کہنا ہے کہ رابطہ سڑک پر گہرے گڑھے بننے کے نتیجے میں انہیں کافی پریشانی ہوتی ہے۔ مذکورہ سڑک پر گاڑیوں کو چلانا ان کی مجبوری ہے کیونکہ علاقے میں آنے اور جانے کا واحد راستہ یہی ہے۔

انہوں نے کہا کہ جب بھی کسی مسافر کو کسی ضروری کام سے جانا ہوتا ہے تو خستہ حال سڑک کی صورتحال کے باعث وہ وقت پر کبھی نہیں پہنچ پاتے۔

مقامی لوگوں نے گورنر انتظامیہ سے مطالبہ کیا ہے کہ وہ مذکورہ علاقے کے رہائش پذیر لوگوں کی مشکلات کو دور کرنے کے لئے اقدامات اٹھائے تاکہ لوگوں کی مشکلات کا ازالہ ممکن ہو سکے۔