پہلگام میں انہدامی کارروائی، کئی کنال اراضی بازیاب

جنوبی کشمیر کے پہلگام علاقے میں تحصیل انتظامیہ نے انہدامی کارروائی کے دوران غیر قانونی طور نصب کیے گئے درختوں کو ہٹا کر کئی کنال اراضی کو بازیاب کیا۔

ضلع اننت ناگ کے پہلگام علاقے میں مقامی باشندوں خصوصا نوجوانوں کے اصرار کے بعد تحصیل انتظامیہ نے تجاوزات کے خلاف انہدامی کارروائی کرتے ہوئے سرکاری زمین پر نصب کیے گئے درختوں کو کاٹ دیا۔

تحصیلدار کے مطابق انہدامی کارروائی کے دوران قریب 35کنال اراضی کو بازیاب کیا گیا جسے کھیل کے میدان کے لیے استعمال میں لایا جائے گا۔

مقامی لوگوں کے مطابق پچھلے کئی برسوں سے نوجوانوں کی جانب سے کھیل کے میدان کا مطالبہ کیا جا رہا تھا تاہم کئی گزارشات کے بعد تحصیل انتظامیہ نے کارروائی کرتے ہوئے اراضی کی نشاندہی کی۔

انہوں نے کہا کہ سرکاری اراضی پر مقامی لوگوں کی جانب سے درخت لگائے گئے تھے جنہیں ہٹا کر کئی کنال اراضی کو بازیاب کیا گیا۔

ذرائع ابلاغ کے نمائندوں سے بات کرتے ہوئے تحصیلدار نے بتایا کہ نوجوانوں کو بہتر پلیٹ فارم خصوصا کھیل کا میدان فراہم کرنا انتظامیہ کی اولین ترجیح ہے۔