کووڈ19 کی صورتحال میں کافی بہتری آئی ہے: ڈی سی اننت ناگ

ضلع ترقیاتی کمشنر اننت ناگ ڈاکٹر پیوش سنگلا نے کہا ہے کہ ضلع میں عالمی وبا کورونا وائرس کی مجموعی صورتحال میں کافی بہتری آئی ہے ’’مثبت معاملات کی شرح میں کمی جب کہ ریکوری کی شرح میں مسلسل اضافہ ہورہا ہے، جو ایک خوش آئند بات ہے۔‘‘

ڈی سی اننت ناگ نے لوگوں کو خبردار کیا کہ وہ ہر حال میں کووڈ19 پروٹوکول کی پاسداری کو یقینی بنائیں، انہوں نے کہا کہ ماہرین نے ایک اور لہر کی پیشگوئی کی ہے، لہٰذا سماج کے ہر ایک فرد کو چاہیے کہ وہ فوری طور پر کووڈ مخالف ویکسین کی خوراک لینے کے ساتھ ساتھ بچاؤ اور احتیاطی تدابیر پر سختی سے عمل کریں۔

ڈاکٹر سنگلا نے یہ باتیں کووڈ19 کی دوسری لہر کی وجہ سے پیدا شدہ صورتحال سے نمٹنے کے لئے ضلع انتظامیہ کی جانب سے اٹھائے جانے والے اقدامات کے بارے میں بریفنگ دیتے ہوئے کہیں۔

تفصیلات فراہم کرتے ہوئے ڈی سی نے بتایا کہ ضلع اننت ناگ میں اس وقت صحتیابی کی شرح 98 فیصد سے زیادہ ہے جب کہ مثبت معاملات میں نمایاں کمی واقع ہوئی ہے۔

ڈی سی نے طبی انتظامیہ سے تاکید کی کہ وہ ویکسینیشن مہم میں سرعت لائیں اور یہ یقینی بنائیں کہ مقررہ وقت کے اندر اندر زیادہ سے زیادہ لوگوں کا ویکسینیشن کیا جائے۔