Militant Attack in Anantnag اننت ناگ میں عسکریت پسندوں کے حملے میں بارہویں جماعت کا طالب علم زخمی

زخمی کو اننت ناگ کے گورنمنٹ میڈیکل کالج میں داخل کیا گیا۔ ڈاکٹروں نے زخمی طالب علم کی تشویش ناک حالت دیکھ کر مزید اعلاج و معالجہ کے لئے سری نگر منتقل کر دیا۔

اننت ناگ:جنوبی کشمیر کے ضلع اننت ناگ وتڑی گام علاقے میں عسکریت پسندوں نے ایک بارہویں جماعت کے طالب علم ساحل بشیر پر نزدیک سے گولیاں چلائیں جس کے نتیجے میں طالب علم زخمی ہو گیا ۔ زخمی کی شناخت سترہ سالہ ساحل بشیر کے طور پر ہوئی ہے۔ زخمی کو اننت ناگ کے گورنمنٹ میڈیکل کالج میں داخل کیا گیا۔ ڈاکٹروں نے زخمی طالب علم کی تشویش ناک حالت دیکھ کر مزید اعلاج و معالجہ کے لئے سری نگر منتقل کر دیا۔ ادھر حملے کے فوری بعد جموں و کشمیر پولیس اور سیکورٹی فورسز نے پورے علاقے کا محاصرہ کیا اور حملہ آور ملیٹینٹوں کی بڑے پیمانے پر تلاش شروع کر دی گئی ہے۔

ذرائع سے معلوم ہوا ہے کہ طالب علم کی گردن میں گولی پیوست ہوئی ہے۔ُ پولیس کے ایک ترجمان نے ایکس پر جانکاری دیتے ہوئے بتایا کہ بدھ کی شام کو دہشت گردوں نے ساہل بشیر ڈار ولد بشیر احمد ڈار ساکن وانہامہ اننت ناگ پر گولیاں چلائیں جس کے نتیجے میں وہ زخمی ہوا اور اس کو علاج ومعالجہ کی خاطر ہسپتال منتقل کیا گیا۔انہوں نے بتایا کہ سیکورٹی فورسز نے ایک وسیع علاقے کو محاصرے میں لے کر حملہ آوروں کی بڑے پیمانے پر تلاش شروع کی ہے۔