عوامی نمائندوں کو سکیورٹی فراہم کرنے کا مطالبہ

جنوبی کشمیر میں گزشتہ روز بی جے پی سے وابستہ سرپنچ سجاد کے قتل کی مذمت کرتے ہوئے بھارتیہ جنتا پارٹی کے رہنما صوفی یوسف نے عوامی نمائندوں کو معقول سکیورٹی فراہم کرنے کا مطالبہ کیا ہے۔

بھارتیہ جنتا پارٹی کے جموں و کشمیر کے نائب صدر صوفی یوسف نے سرپنچ سجاد کھانڈے کی ہلاکت کو افسوسناک قرار دیتے ہوئے اسے پاکستان و دیگر ایجنسیوں کی سازش قرار دیتے ہوئے اس اقدام کو قیام امن میں بگاڑ پیدا کرنے سے تعبیر کیا۔

واضح رہے کہ گزشتہ روز جنوبی کشمیر کے ویسو، قاضی گنڈ میں عسکریت پسندوں نے بی جے پی کے ضلع نائب صدر و سرپنچ سجاد کھانڈے کو گولی مار کر قتل کر دیا تھا۔

صوفی یوسف نے سجاد کے قتل کے حوالے سے کہا: 'اسطرح کی کوششوں سے بھاجپا کے مشن پر کوئی اثر نہیں پڑے گا اور نہ ہی بھارتیہ جنتا پارٹی پسپا ہوگی۔' تاہم انہوں نے پنچایتی اور میونسپل نمائندوں کے لئے سرکار سے معقول سکیورٹی کا مطالبہ کرتے ہوئے کہا کہ 'حکومت کو چاہئے کہ وہ عوامی نمائندوں کو معقول سکیورٹی فراہم کرے۔'

ای ٹی وی بھارت کے ساتھ بات کرتے ہوئے صوفی یوسف نے کہا کہ 'بعض عناصر کشمیر کی ترقی اور خوشحالی نہیں چاہتے اور بھارتیہ جنتا پارٹی کے ورکروں کو ڈرانے کی کوشش کرتے ہیں۔'

صوفی یوسف نے پارٹی ورکروں سے اپیل کرتے ہوئے کہا کہ 'انہیں ڈرنے کی ضرورت نہیں اور بی جے پی ورکر کشمیر کی تعمیر و ترقی کے لئے ہمیشہ کام کرتے رہیں گے۔'

صوفی یوسف نے سرپنچ سجاد احمد کھانڈے کے قتل پر افسوس کا اظہار کرتے ہوئے کہا کہ 'ہم سجاد کی جدائی کے غم میں برابر کے شریک ہیں اور اس مشکل وقت میں ان کے اہل خانہ کے ساتھ شانہ بشانہ کھڑے ہیں۔'