سیاحتی مقام پہلگام کی سڑکوں کی حالتِ زار

ضلع اننت ناگ میں واقع سیاحتی مقام پہلگام دنیا میں مشہور ہے، تاہم اس سیاحتی مقام کی رابطہ سڑکوں کی حالت اتنی خستہ ہے کہ لوگوں کا چلنا محال ہو چکا ہے۔

ای ٹی وی بھارت سے بات کرتے ہوئے میر پورہ بٹکوٹ کے لوگوں نے کہا ہے کہ 'اگر چہ آج تک انہوں نے اس حوالے سے انتظامیہ کو بار بار آگاہ بھی کیا۔ تاہم وہ خاموش تماشائی بنا ہوا ہے۔'

انہوں نے انتظامیہ کے خلاف سخت برہمی کا اظہار کرتے ہوئے کہا کہ 'یہاں کی رابطہ سڑکیں انتہائی خستہ حالی کا شکار ہوئی ہیں جس کی وجہ سے لوگوں کو کافی مشکلات کا سامنا کرنا پڑ رہا ہے۔'

انہوں نے بتایا کہ 'سڑک میں جگہ جگہ پر بڑے گڑھے بن چکے ہیں۔ سڑک پر عام لوگوں کا چلنا محال ہو چکا ہے۔ یہاں تک کہ سڑک پر گاڑیوں کا چلنا بھی مشکل ہو رہا ہے۔ عام لوگوں کے چلنے پھرنے کی تو بات ہی نہیں ہے۔'

لوگوں نے بتایا کہ 'ایمرجنسی کی صورت میں مریضوں کو ہسپتال پہنچانے میں شدید دشواری کا سامنا کرنا پڑتا ہے۔'

انہوں نے کہا کہ 'ڈیجیٹل دور میں بھی عوام کے بنیادی مسائل کا حل نہ ہونا کسی بڑے المیے سے کم نہیں۔'

یہ بھی پڑھیں: 'میں اب بھی مانتا ہوں کہ جموں و کشمیر بھارت کا اٹوٹ حصہ ہے'

لوگوں کا کہنا ہے کہ 'گزشتہ برس انتظامیہ کی جانب سے 'بیک ٹو ولیج' کے تحت گاؤں کی سڑکوں کو ترجیحی بنیادوں پر ٹھیک کرانے کی بات کی گئی تھی، تاہم ابھی تک ان سڑکوں کی مرمت نہیں کی گئی۔'

انہوں نے ضلع ترقیاتی کمشنر اننت ناگ سے مطالبہ کیا ہے کہ وہ ان کے اس مسئلہ کی طرف اپنی توجہ مرکوز کریں تاکہ لوگوں کو درپیش مشکلات سے نجات مل سکے۔