اننت ناگ میں آنگن باڑی کارکنان کا احتجاج

جنوبی کشمیر کے ضلع اننت ناگ میں آنگن باڑی ہیلپرس اور ورکرس یونین سے وابستہ خواتین نے ملازمت کو مستقل کرنے اور بقایا اجرتوں کی ادائیگی کے مطالبے پر احتجاج کیا۔

آنگن باڑی ہلپرس اور ورکس یونین سے وابستہ متعدد خواتین نے اسپورٹس اسٹیڈیم اننت ناگ میں جمعہ کو احتجاجی مظاہرہ کیا۔

مظاہرین نے ملازمت کو مستقل کرنے، بقایا اجرتوں کو وا گزار کرنے اور ہر مہینے پابندی سے تنخواہ دینے جانے کا مطالبہ کیا۔

احتجاجی خواتین نے الزام عائد کیا کہ سرکار و انتظامیہ ان سے ہر طرح کا کام لے رہی ہیں۔ چاہے وہ ویکسینیشن ہو یا الیکشن کی ڈیوٹی، یا پھر کوئی ناگہانی آفات ہو، آنگن واڑی ورکرس ہمیشہ ہر محاذ پر انتظامیہ کے شانہ بشانہ ساتھ ہوتی ہیں۔ تاہم انتظامیہ ان کے جائز مطالبات کو نظر انداز کر رہی ہے۔

انہوں نے کہا کہ وقت پر اجرت نہ ملنے اور کم اجرت کے باعث انہیں کافی مشکلات کا سامنا کرنا پڑتا ہے۔

احتجاجی خواتین نے مزید کہا کہ اگر ان کے جائز مطالبات کو جلد از جلد پورا نہ کیا گیا تو آنے والے وقت میں وہ احتجاج میں شدت لانے کے لیے مجبور ہو جائیں گی۔