ویری ناگ میں عوام نے مبینہ طور چوروں کو رنگے ہاتھوں پکڑ لیا

جنوبی کشمیر کے ویری ناگ علاقے میں لوگوں نے مبینہ طور چوروں کو رنگے ہاتھوں دھر لیا اور پکڑے گئے افراد اور ان کے قبضہ سے بر آمد 'مال مسروقہ' کو پولیس کے سپرد کر دیا۔

جنوبی کشمیر کے ضلع اننت ناگ میں ویری ناگ علاقے کے قمر گاؤں میں مقامی لوگوں نے دوران شب دو افراد کو مبینہ طور چوری کرتے ہوئے رنگے ہاتھوں پکڑ لیا۔

ای ٹی وی بھارت کے ساتھ بات کرتے ہوئے مقامی باشندوں نے دعویٰ کیا کہ پکڑے گئے افراد نے پیر اور منگل کی درمیانی شب قمر ویری ناگ میں واقع چھ دکانوں سمیت مقامی زیارت گاہ میں نقب زنی کی واردات انجام دی جس دوران مقامی لوگوں نے ان کو دھر دبوچا۔

مقامی باشندوں کے مطابق علاقے کے لوگ جمع ہوئے اور نقب زنوں سے مال مسروقہ بھی برآمد کر لیا۔

لوگوں کا کہنا ہے کہ ’’نقب زنوں نے رات کو ہی قریب چھ دکانیں لوٹنے کے علاوہ مقامی زیارت گاہ کی ’دان پیٹی‘ کو توڑ کر نذر و نیاز کی رقم بھی اڑا لی تھی۔‘‘ بعد ازاں پولیس کو مطلع کیے جانے کے بعد مقامی پولیس اسٹیشن کی ٹیم جائے واردات پر پہنچی اور عوام نے دونوں ’لٹیروں‘ اور مال مسروقہ جس میں نقدی بھی شامل ہے، کے علاوہ واردات انجام دینے کے لیے استعمال کی گئی گاڑی کو بھی پولیس کے سپرد کر لیا۔

مقامی لوگوں نے پکڑے گئے افراد کے خلاف سخت کارروائی کیے جانے کی اپیل کی ہے۔