ضلع اننت ناگ کے اشاجی پورہ میں قائم انڈسٹریل ٹریننگ انسٹی ٹیوٹ میں محکمہ اسکل ڈیولپمنٹ کی جانب سے روزگار میلہ کا انعقاد کیا گیا۔ اس دوران مختلف مقامی صنعت کاروں نے ’’بے روزگار نوجوانوں کو روزگار کے مواقع فراہم‘‘ کرنے کے لیے اسٹالز لگائے تھے۔
روزگار میلہ میں ایک تقریب کا بھی انعقاد کیا گیا جس میں روزگار میلہ کے انعقاد کے بنیادی مقصد کے بارے میں شرکا کو روشناس کرایا گیا۔
ادھر، طلبہ نے متعلقہ حکام کے تئیں ناراضگی کا اظہار کرتے ہوئے کہا کہ روزگار کے نام پر انہیں بے وقوف بنایا جا رہا ہے۔
طلبہ نے کہا کہ وہ خراب موسم کے باوجود وہ روزگار میلہ میں شرکت کرنے آئے تھے تاکہ وہ یہاں آکر روزگار حاصل کر سکیں۔ تاہم ’’یہاں صرف مقامی صنعتکاروں کے اسٹالز قائم کئے گئے ہیں جبکہ اس میلہ میں ایک بھی قومی یا بین الاقوامی کمپنی موجود نہیں ہے۔‘‘
انہوں نے روزگار میلہ کو ’’فلاپ شو‘‘ قرار دیتے ہوئے کہا کہ ’’اس سے بے روزگار نوجوانوں کو کوئی بھی فائدہ نہیں پہنچ سکتا۔‘‘