اننت ناگ میں منشیات ضبط، دو افراد گرفتار

پولیس نے معاملہ درج کر کے منشیات فروشوں کے خلاف کارروائی شروع کر دی ہے۔

منشیات مخالف مہم کو تیز کرتے ہوئے جمعہ رات کے روز ضلع اننت ناگ کے سنگم چوک میں پولیس پارٹی کی جانب سے ایک ناکہ قائم کیا گیا تھا۔ ناکہ کے دوران ایک ٹرک کی تلاشی لی گئی۔ تلاشی کارروائی کے دوران ٹرک سے چار سو گرام سے زائد چرس برآمد کیا گیا۔ ٹرک ڈرائیور کی شناخت کھنمو سرینگر کے رہنے والے فردوس احمد بٹ ولد فاروق احمد بٹ کے طور ہوئی ہے اور مذکورہ شخص کے خلاف معاملہ درج کر کے گرفتار کیا گیا ہے۔

وہیں جنرل بس اسٹینڈ اننت ناگ میں پولیس کی جانب سے قائم کئے گئے اور ایک ناکہ کے دوران بغیر نمبر پلیٹ ایک سینٹرو کار کو روکا۔ تلاشی کارروائی کے دوران کار سے 400 گرام چرس برآمد کیا گیا۔ گاڑی کے ڈرائیور عبدالرشید حجام کو موقعے پر ہی گرفتار کیا گیا۔ اس کا تعلق ضلع اننت ناگ کے کاوری گام رانی پورہ سے بتایا جا رہا ہے۔

پولیس نے گاڑی ضبط کر کے اس سلسلہ میں ایک معاملہ درج کیا ہے۔