اننت ناگ: اسمگل کی جارہی تعمیراتی لکڑی ضبط، چار افراد گرفتار

جموں و کشمیر کے ضلع اننت ناگ میں محکمۂ جنگلات کی تشکیل شدہ ایک ٹیم نے کارروائی کرتے ہوئے چار اسمگلرز کو غیر قانونی لکڑیوں کے ساتھ گرفتار کرلیا۔

ضلع اننت ناگ کے کوٹہار فاریسٹ رینج کے علاقہ شانگس کے جنگلوں میں فارسٹ کنٹرول روم شانگس و رینج آفیسر شانگس کی ہدایت پر شانگس کے کمپارٹمینٹ 66 k کے احاطے میں محکمۂ جنگلات کے اہلکاروں نے ناکہ لگایا اور چار اسمگلروں کو گھوڑوں سمیت گرفتار کرلیا۔

اس بارے میں ڈی ایف او اننت ناگ فیروز چاکٹ نے بتایاکہ دوران شب محکمۂ جنگلات کی ایک ٹیم نے مصدقہ اطلاع ملنے پر لکڑی سے لدھے ہوئے چار گھوڑوں کو پکڑا ہے۔ تقریباً 30 فٹ لکڑی ضبط کی ہے۔ جو غیر قانونی طور پر جنگل سے کاٹی گئی تھی۔

انہوں نے کہا کہ گرفتار کئے گئے اسمگلرز کی شناخت ہونی ابھی باقی ہے۔ محکمۂ جنگلات نے چاروں اسمگلروں کو پولیس کے حوالے کرتے ہوئے ان کے خلاف کیس درج کیا ہے۔