سہولیات کے بغیر ہسپتال کا کیا فائدہ؟

ضلع ہیڈ کوارٹر اننت ناگ سے محض 25 کلومیٹر دور علاقہ ڈیٹھو اور آس پاس کے درجنوں گاؤں کی ہسپتال کی دیرینہ مانگ اگرچہ ایک سال قبل پوری کی گئی لیکن ایک سال گزر جانے کے بعد بھی اس ہسپتال کو بنیادی سہولیات سے محروم رکھا گیا ہے۔

اگرچہ انفراسٹرکچر کے لحاظ سے ہسپتال بہت اچھا بنایا گیا ہے لیکن لوگوں کو بنیادی سہولیات نہ ملنے کی وجہ سے ابھی بھی اس ہسپتال کا کوئی فائدہ نہیں مل رہا ہے۔

لوگوں کے مطابق ابھی اس ہسپتال میں مکمل طور پر طبی و نیم طبی عملہ تعنیات نہیں کیا گیا ہے اور نہ ہی کوئی مشین لگائی گئی ہے، چھوٹے چھوٹے ٹیسٹ کروانے کے لیے بھی انہیں 20 کلومیٹر دور جانا پڑتا ہے۔

لوگوں کے مطابق اس ہسپتال کے شروع ہونے کے بعد ہمیں لگ رہا تھا کہ جن پریشانیوں کا سامنا ہمیں کرنا پڑ رہا تھا اب ہمیں ان پریشانیوں سے چھٹکارا ملے گا، لیکن محکمہ صحت کی اس ہسپتال کے تئیں عدم توجہی اور غیر سنجیدگی کی وجہ سے ہمیں ابھی بھی کافی مشکلات سے دوچار ہونا پڑرہا ہے۔

جب کبھی رات کے وقت یہاں پر کوئی بیمار ہوتا ہے یا کوئی عورت درد زہ میں مبتلا ہوتی ہے تو ہسپتال میں نائٹ سٹاف موجود نہ ہونے کی وجہ سے ہمیں دور دراز ہسپتالوں کی طرف رخ کرنا پڑتا ہے۔

ہسپتال میں نہ ہی کوئی ماہر ڈاکٹر تعنیات کیا گیا اور نہ کوئی یہاں کوئی دوائی مہیا کی جاتی ہے جس کے نتیجے میں علاقے کی وسیع آبادی کو علاج ومعالجہ کے حوالے سے طرح طرح کے مشکلات کا سامنا کرنا پڑ رہا ہے۔

اس معاملے کو لیکر جب ای ٹی وی بھارت اردو کے نمائندے نے سی ایم او اننت ناگ مختار احمد سے بات کرنے کی کوشش کی تو بار بار رابطہ کرنے پر انہوں نے بات کرنے سے انکار کیا۔